2022世界盃 - 決賽(Day 23) 阿根庭v法國

 加埋休息嗰六日，前後29日，終於去到第64場，最後一場波了。

去屆16強嘅翻版，四年前加時輸咗3:4，今次係決賽，本來以為唔會有咁大比數交易⋯⋯

上半場我諗冇人會估到咁一面倒，今場史卡朗尼決定放返休息咗幾場嘅迪馬利亞打正選，真係得到一個意外地好嘅結果！整個上半場，法國隊只有捱打嘅份！

23分鐘，迪馬利亞响禁區邊被踢跌，搏得十二碼，美斯操刀，好淡定咁等羅里斯郁咗先射右邊入網，成為第一個人响單屆世界盃每一個階段（分組賽、16、8、4、決賽）都有入波嘅球員。

而且，响36分鐘，一個好簡單嘅快速返擊，未過半場美斯攞到波傳畀中線邊嘅艾華利斯，佢一腳one touch 傳個直線畀中路快跑嘅麥亞里士打，佢追到去禁區頂再一腳one touch斜交去禁區左邊，迪馬利亞無人看管下控都唔駛控一射入網！由美斯發動進攻開始，四個人，四腳波就領先到2:0！

成隊都踢得好好，防守亦做到足，安巴比機本上都冇乜機會上腳用波。法國隊其他人亦無甚作為，連前幾場表現好好嘅基士文及基奧特都非常失色。41分鐘已經唔對路到要換走輸十二碼嘅丹比利同埋基奧特。

整個上半場，法國隊係0攻門，係，竟然一次射門，連浪射嘅機會都冇！

半場休息時勁開心，以呢個形勢，仲有兩球响手，等多半場就可以見到最想見嘅畫面。

呢個諗法一直去到70分鐘都係咁諗，法國隊半場出返來都冇乜起色。

不過64分鐘換走咗迪馬利亞，換咗阿古拿入來多個人防守後，法國隊 71分鐘作出調整，連基士文都換走埋，換咗兩隻後生快馬入來，Coman & Camavinga 兩個入咗來後，多咗人跑動，打亂咗阿根庭嘅防守節奏！

79分鐘，快攻半單刀殺入禁區Kolo Muani，引得奧達文迪拉跌咗佢，球証直指十二碼⋯⋯麥總勁射左邊，馬天尼斯掂到個波皮都阻唔到佢入網！追成 2:1！

更大鑊嘅係，一分鐘後，美斯响中場邊線想突破時被搶走腳下球，一個快反擊，後防一亂，走漏咗麥總，畀機會佢响禁區入面表演咗一腳窩利射門，兩分鐘內追成平手！

80分鐘嘅大好形勢，突然間冇晒，大家由頭嚟過！士氣上更去晒法國隊嗰邊，真係勁驚完場前仲會輸多球！最後2:2完場，要進入加時

加時階段大家都小心咗，法國都冇咁狂攻，反而畀阿根庭重整返個勢，換返啲人出來多返啲進攻。

去到加時下半場，108分鐘，4號Montiel右邊近中場線腳傳去前面三個隊友vs4個守衛，22號前鋒馬天尼斯接應交咗畀美斯，美斯再傳畀 24號安素費南迪斯，佢立即直線再傳入禁區畀啱啱交波走位嘅馬天尼斯响小禁區角起腳，但畀羅里斯拍到個波出來，美斯快步加一腳，回防嘅中堅想護空龍，但個決已經過咗白界！入球有效，美斯入到今屆第七球，再度領先3:2！

得返十分鐘左右，超緊張！捱到115分鐘，法國隊一個角球，個波頂返出禁區頂，安巴比起腳遠射，兩個守衛飛身擋波，但個波省中咗Montiel 嘅手踭，球証又判罰十二碼！麥總又一次勁射左邊入網，追平3:3，仲要畀佢大演帽子戲法！

最後嗰5分鐘簡直唔敢睇，兩邊都唔想射十二碼，繼續攻來攻去，但都攻唔入，補時去到 120+3都有多了，竟然畀法國有球半單刀，右路12碼左右起腳勁射，好彩馬天尼斯出迎，一個大字形用左大脾擋返個波出來！呢球輸咗就真係冇仇報！ 

最終3:3完場，要用最驚心動魄嘅十二碼大戰決定冠軍！

安巴比負責第一球，第三次勁抽左邊，馬天尼斯撲到都照入；美斯第一球窒步射，羅利斯堅持唔郁最後先撲，但落地唔夠快照入，1:1

法國第二球高文操刀，馬天尼斯連續兩球估中方向，今次成功撲出；阿根廷第二球由120分鐘先換入嘅戴巴拿操刀，射中間地波入網，見到佢都有出過兩場，仲入返球十二碼都替佢開心。2:1

法國第三球由祖亞連尼處理，射左邊柱邊斜出，馬天尼斯再次捉到路；阿根廷第三球Parades負責，羅里斯撲到照入，3:1

法國第四球唔入就輸，Muani射中間高波入網；阿根廷第四球射入就封王，成功由剛才不幸輸球十二碼嘅Montiel破網～～～～～～

阿根庭係2022世界盃冠軍！

由90年睇住佢哋決賽輸畀西德開始，八年前決賽加時又一次輸畀德國飲恨，睇咗 9屆世界盃，足足32年，由馬勒當拿喊，到巴迪高02年嘅眼淚，之後美斯經歷到今年第五屆，終於可以親眼見到阿根庭隊徽可以變做三粒星了！

仲要係一場咁峰迴路轉，刺激到爆炸嘅決賽，真係差啲心臟病發！

終於有一屆係好開心咁睇頒獎禮！

最佳年青球員：安素南迪斯

最佳守門員：馬天尼斯，唔係佢十二碼嘅神級表現都攞唔到冠軍

神射手：安巴比 8球 ，美斯7球差少少，今場入球輸咗畀佢

最佳球員：美斯，佢成為第一個攞兩次世界盃最佳球員嘅人！

冠軍：阿根庭 Argentina!

千言萬語，不知從何說起，總之就係超級開心！除咗阿根庭雙隔36年再捧盃外，全球好多球迷都好感動可以見證到美斯成功可以捧盃，完成咗佢球員生崖入面最後一塊拼圖！

阿根庭更响一年多內，成為咗美洲國家盃，洲際超級盃，世界盃 三料冠軍！

呢幾日都有啲世界盃後遺症，不停睇相關嘅新聞，見到好多靚相都忍唔住儲起咗，揀幾張最感動嘅放响度啦，放唔晒咁多！

而我，終於有一次係有心情寫足咁多場，寫到去決賽了！

2022世界盃 - 決賽前夕

距離決賽開波仲有12小時左右，心情都仲係好緊張，希望美斯，同一隊咁團結嘅阿根庭有一個美滿嘅結局！

今屆係最後一次32隊，64場波嘅世界盃，已完了嗰63場入面，我只係冇睇到澳洲1:0突尼西亞嗰一場。下一屆增加到48隊，比賽型式都未定實，可能係80-104場嘅比賽，應該都幾難睇足晒。

而且，之前幾次寫世界盃，都係去到阿根庭出局之後就唔想再寫，今次總算可以寫到去最後一日，希望明天我會有心情寫埋個決賽！

由90年意大利世界盃開始睇波，又唔知點解當時鍾意咗阿根庭，睇住佢哋殺到入決賽，但輸咗畀西德⋯⋯就係咁，32年了，第九個世界盃，第三次見到阿根庭入決賽，希望終於親眼見到佢哋捧起個大力神盃！

尤其是美斯最後一場世界盃了，希望佢經歷五屆，終於可以圓夢！

對法國隊一啲都唔容易，上屆就係十六強輸咗3:4畀佢哋出局，希望今次可以成功報仇兼阻止佢哋衛冕！

90年同西德爭邊個有三粒星星先，今次到同法國爭，一定要爭贏！

2022世界盃 - 季軍戰(Day 22) 克羅地亞v摩洛哥

 終於睇到第63場波，四強輸咗嗰兩隊早決賽一日爭季軍。

呢場真係好難講想支持邊隊，克羅地亞有摩迪，佩里錫，都想佢哋最後攞返個安慰獎。另外摩洛哥嗰邊又的確係踢咗幾場好波，成為第一支入四強的非洲隊，如果可以攞到季軍都可算係一時佳話。

克羅地亞 2:1 摩洛哥

向來季軍戰兩隊都沒有太大包袱，最重要嗰場上場已經輸咗，今場大家都會放開懷抱盡情踢返場好波。

所以一開始兩隊都好積極進取咁進攻，只係7分鐘，克羅地亞戴住面罩嘅後衛Gvardiol，接應佩里錫嘅傳中球，飛身好靚咁插水式頂咗個波入網！一吐上場守唔住美斯助攻嘅烏氣，幫球隊領先 1:0。

不過摩洛哥都唔執輸，從新開波嘅第一個攻勢，又係一個好靚嘅頭槌，只用咗兩分鐘，Dari就成功追平返1:1！

兩隊快上快落，交替進攻一輪，克羅地亞成功埋門嘅次數較多，摩洛哥就攻勢唔少，但真係起到腳嘅機會唔多。

去到42分鐘，克羅地亞一輪攻勢，摩洛哥後防未能清脆解圍，响禁區頂畀Livaja攞到個波傳咗畀禁區角附近嘅Orsic，佢一控一射，個波彎咗去遠柱撞柱入網，再度領先 2:1。

下半場，雙方都有唔錯嘅機會，但再沒有取後入球，補時去到96分鐘，摩洛哥最後一個角球，近門頂中，但僅僅楣頂高出少少，之後球証嗚笛完場，兩隊合演咗一場好波。

克羅地亞繼上屆嘅亞軍，今年都攞返個季軍，摩迪37歲之齡踢足全場，見到佢最後高興地親吻獎牌，都好替佢哋開心。

兩年後嘅歐國盃，睇下呢兩隊會唔會有帶畀大家咩驚喜。

2022世界盃 - 四強(Day 21) 法國v摩洛哥

法國 2:0 摩洛哥

作為第一次擠身四強嘅非洲球隊，今屆穩健嘅防守贏得了世界嘅掌聲，摩洛哥是今屆令人驚訝嘅一隊。

可惜開賽僅五分鐘，法國隊把握到摩洛哥後防嘅一個小失誤，傳到個波入禁區，一輪混亂之後，個波彈咗去遠柱小禁區角，被Hernandez 一個車身射咗入網，法國領先1:0。

踢到第六場波，第一次被對手攻破大門。

咁早失波，令呢一場波有一個意料之外嘅形勢，就係法國主守，摩洛哥主攻！

基本上，摩洛哥控球率有六成，不停發動攻勢，其實有好幾次都差啲可以追平，只係每次都差少少。其中一下倒掛金鈎令人難忘，羅里斯神勇及時救出。

估唔到摩洛哥除咗防守，進攻積極起上來都有一定威力，如果多一個把握力好一點嘅前鋒，成隊波就更正。

久攻不下，去到79分鐘更加被潑一盤冷水，麥巴比禁區頂突圍扭過兩三個後衛入禁區起腳，被防手球員截到，但個波彈咗去柱邊，被啱啱後備入替嘅Kolo Muani近門撞入，領先到 2:0！

餘下嗰十幾分鐘，都係摩洛哥主導賽事，只可惜最後都破唔到蛋，只可以星期六在季軍戰再一次面對分組賽嘅對手克羅地亞。

而星期日嘅決賽，阿根庭對法國，PSG隊友，美斯及麥巴比嘅對碰，衷心希望美斯可以圓夢，一嚐捧起大力神盃嘅嗞味。

2022世界盃 - 四強(Day 20) 阿根庭v克羅地亞

 經過咗六十場比賽後，得返最後四場，就知道冠亞季軍誰屬。

阿根庭 3:0 克羅地亞

呢場比賽，見証着呢兩個十號响世界盃舞台最後一次交手。

比賽初段，兩隊都踢得比較小心，克羅地亞先控波較多，盡量減少阿根庭上腳進攻嘅機會。

到34分鐘，艾華利斯Alvarez接應由中圈而來嘅長傳，成單刀之勢殺入禁區，守門員出迎，佢輕輕一挑過守門員，然後被撞跌咗响地，球証直指十二碼點！

美斯勁射右邊網頂，守門員捉到路都救唔到，美斯入到第五球，領先1:0。

5分鐘後，克羅地亞一次攻勢，禁區內解圍出來，美斯控球响前推進，未跑到中圈已被撞跌，球証見到艾華利斯衝咗埋個波度繼續反擊，所以畀得益冇吹罰，估唔到艾華利斯由後半場嘅中圈，一路直線盤球，經過咗兩個守衛嘅攔截，個波仍然撞返响佢前面，最後响守門員面前快一步射咗個波入網！領先2:0！

雙方都互有攻守，全場射門次數 10(7):12(2) 差唔多，但命中目標嘅射門，克羅地亞只得兩次。

69分鐘，由後場一個界外球開始

艾華利斯用心口控個波畀由中場線起跑嘅美斯，自己走位跟進

一直跑咗50米去到禁區邊急停轉身

再一個假身反方向跑落底線

殺入禁區，看準機會傳波畀艾華尼斯

企响一個最有利嘅位置輕鬆射入！ 

又一次証明，美斯唔係跑唔郁，而係佢要响最適當嘅時候先跑畀你睇！

就係咁樣，美斯今場又交出一入球一助攻，順利擠身星期日嘅決賽！

佢哋完場後都好開心，只差一步，大力神盃就到手了！