脾氣一記

下午三時午，正忙得如火如荼之際，
好女友打電話來，話我老爸叫我得閒時洗左o的碗去，
第一時間就好煩嫌地應了一句︰「洗碗？！我早餐都未得閒食呀！睇下點先啦！」

跟住她竟不識趣地還轉述多一句︰「您爸爸話返來唔要見到堆未洗的碗。」
即時忍唔住發了個小脾氣︰「都話做緊野！得閒咪洗lor，再唔係我睇下邊個返來先會得閒咪叫佢洗lor.......」

跟住大概有人在扁咀罷.......我知她在做傳話，唔應該發佢脾氣...但其實我諗佢都唔知我發乜脾氣.......對罷？

唉！有時唔係話唔想幫屋企做家務，有時間的話，我做左都冇人知啦。只係非常唔鐘意一個電話上來就叫我做乜做物.....有冇人在意過我都係返緊工？我都係office hour緊呀....甚至我office hour唔係9-5添.....

家務的o野，想人幫手可以講低，但唔好好似我真係糧地係屋企冇野做咁先得架，
有時講左得，我冇做又好似我唔理屋企咁...但係同個客傾緊電話時您入線怱怱交低兩句，真係分分鐘傾完個客個電話，做下野就唔記得架啦........甚或有時記得又如何？忙起上來，唔好話食飯....toilet都未有時間去啦.....

莫非真係要離開家門，才俾人記得我係工作中？.........

愛莫能助

今天好拍檔又奉召去了那個客的office度做o野
下午三點去到，最理想都要七八點先有得走.....

而我，就負責在公司分部(即梁宅)做後援，
佢o地要用乜就我做好晒變晒圖傳送過去，
到六點幾已知不妙，進度比預期中慢！
.....最後，十二點的電話，
從客人口中得知....拍檔才剛剛離去踏上歸途...
噢！多可憐！

有點好像賣甩佢咁.......但我所有的原始檔都在家....
而且，兩個人困在那兒一天的話，就更蝕！

好拍檔，今天難為您了！

生活迫人的夢話

身邊的人好像都有點透不過氣︰
有人為找工而煩腦，
有人為健康而終日唉聲嘆氣，
有人為考試而日日在自修室關門才回家，
有人同為考試卻不知為向誰交代，
有人為婚姻危機而影響良多...，
有人為婚姻的籌備弄到忙上加忙，
有人為目標而開始學習甜品，
有人為原則而討論得面紅耳熱，
有人為份工每天都要超時工作，
有人不知為甚麼……只知道真的開始有點累了……
或許，就是因為不知道為甚麼，所以才會覺得累
不是身體上的累，而是心靈上的累，
係時候找些新衝擊了……

快點找人中次六合彩……這個衝擊真的很不錯！

>.< 發夢！

刧後重生 cast away

兩三年前的電影，
到今晚才在公仔箱中第一次看。

不像想像中的一樣，
本以為是一個現代版的魯賓遜飄流記，
但他去到的荒島，比魯賓遜那個....應該「荒」很多！

一個人在那個小島上生活四年多，
先不論要解決生理上的需要的求生能力，
要解決那個心理上的創傷，那種孤獨，那種無助感，才是最難刻服的。

記得，小學的社會書已會寫到....「人類是群居的動物....」
看著這齣戲，才醒起這句話。
原來，真係「群居」的。

無論您多麼獨立，自主，不怕孤獨也好，
您有冇信心可以...不要說荒島，就說關自己在屋內四個月？
給您一切食物食水，但不可以接觸一切和「人」有關的事物！
報紙、電視、收音機、書本、電玩、電腦、互聯網、電話、傳呼機.......
通通都沒有.....
不知道大家怎樣...如果是我....

初初可能自得其樂地寫下東西，畫一些不入流的畫等等.....
但真的不敢說可以支持多久.....想想下都真係頗可怕！
對住個排球當朋友，可算係一個最最最低程度的精神病了！

想不到，脫險後的內容亦真的不錯，
一個支持了自己四年多的愛人，卻....
奈何，怪不得人....天曉得還會有重生的一天？
除了無奈接受，還可以怎樣？

結局那一幕，站在十字路上，不知自己何去何從，
到最後，面上露出一絲新希望，
經歷那麼多之後，大概他亦一定會選擇向十字路口的「那」一個方向行....
哪一個？......大家以為呢？

長篇大論又說了很多，
最後，想談一談湯漢斯，
作為一個演員，他的演技公認是一絕，
再看他為部戲，初時的身形及後來的身材，
可以看見他要下多少苦工！
要一個中年男人變肥再變返咁fit.....真係難得緊要...
不得不寫個「服」字！

整朱古力記

昨天友人不知甚麼原故，
突然想弄點東西搞作搞作，
打電話來問我造點甚麼來試試好，
最後決定做朱古力。

自己還忙緊工作上的事情，
不過有人自己買東西上來整，
倒又來者不拒。

最後，都有抽點時間和他一起試試，
做了三輪，
第一輪都算ok，只係太大粒，
好硬！好甜！........下次做細粒o的先得
不過叫做研製成功兩項新發明！
1) 開心朱古力 2)sake朱古力

第二輪....
初時好好的，
但一時衝動，搞到一發不可收拾，
原來朱古力加入其他東西後，溶點係可以突然增加咁多！

第三輪︰
安份咁做，整了三隻公仔
但未試食，雪了一晚
剛才拿出來看看……
唔知點解！好似都係好硬！.......

明天叫友人上來一起搞掂佢先得！

病倒了...

昨天中午開始
個肚好唔舒服
偏頭痛又發作.......

勁辛苦.......
最後做到六點左右都頂唔順訓到九點半先起身食飯
個肚到現在都仲係怪怪o地咁.....
唉.....

夜宵二

今天忙了一整天，
下午五點幾以為做好，拿成果出去交貨.....
怎料還是有錯處.....唉！

於是又回來再改....
最後又一次零晨時份出門口交貨！

不過今晚他到了我樓下的食店，
不用我坐車出沙角了！方便好多。

談了大半個小時，
其中講到他請人的心得，
見他最近請的幾個大學生part time都好似幾好呀
至少我見親佢o地都係好勤力咁做緊野

佢o地出數學教材o既，請人當然要計數叻
順口問了佢，不如叫三弟會考後去幫佢手，
俾佢見下世面學下野都好呀！
當然他一口答應啦，他從太太口中聽我這個弟弟的事就聽得多啦，
都想見下佢o既！

話時話，艾云唔知有冇興趣，在這種方向去在教育界打滾呢？
佢o地好似有個fulltime 因結婚生仔辭了職....

夜宵

今天忙了一整天，
都是做不完手上的工作，
本來下午要拿些東西給個客睇，
但最後做到晚上十一點幾都只係做完四份之三！

黃昏時，他知我未做完，都話不如找我食夜宵順便拿碟，
我本來以為他坐的士，來到我樓下食，
怎料十一點半時他才說去沙角村

於是，就十二點幾才出門口，向沙角村出發。
突然有種奇怪的感覺，要半夜出去和個客食夜宵........
好鬼麻甩feel.....想都冇想過！

不過這個客有點特別，亦師亦友的，
佢當我學生咁對待就真，因為我都曾經總算係佢太太的學生。

食點東西，談談他公司的計劃，
希望真的繼續在他公司的發展上幫到下手，
其一係為收入來源，其二當然係想學下人點搞公司！

食完，他坐的士送我回來先，
入門口時已零晨一點半了！

師奶天地

今天一早和女友出了physical做gym
真的一早，八點起身，九點出到去！

未試過早到咁去做gym，
才發現原來那個時段係屬於師奶的！
男更衣室入面得兩三個人，
但yuki卻說女更衣室入面要排隊！

去到健身房....
只看見很多很多師奶在跑步機區域！
男仕大概一隻手數得晒！

原來現在都很多師奶選擇這做方法做運動，
總好過郁都唔郁掛....

另外，一個人用晒個桑拿室的感覺真好，
喜歡點都得！哈哈！

私人星空

星期日在第一城的攤檔中，
看到些一包包的夜光星星特價，
心血來潮買了幾包回來，
用了些時間把它們全數貼上房間的天花板上。

有一個大大的彎彎月亮，
大大小小的星星，
關門閉窗熄燈一看，
真的很美，尤其我是睡上格床的....
未能每晚看到真正的星空，
這亦不失為一個很好的代替品。

唯一不足的是....原來熄燈後...
它們只會亮不到半小時.....