2022世界盃 - 分組賽第二輪 （Day6) A、B組

 Day 6

第二輪分組賽開始，今日係A, B組共四場

B組 威爾斯 0:2 伊朗

第一場大敗 2:6 之後，大家都以為伊朗今場都勝算不高。不過可能吸取咗上場的教訓，加上球員們响國內暴政發聲，聲援國來被鎮壓嘅民眾一事，佢哋嘅國家機器當然冇咁順攤。最少今日迫到班球員要郁下個口扮唱國歌⋯⋯有啲現場觀眾見到忍唔住喊！

場波其實兩邊都唔係好做到危機，反而伊朗有啲攻門似樣啲，有一球先中右柱，彈出再補射中埋左柱，再彈出，仲有機會補射多腳，卻射中咗個守門員⋯⋯

到86分鐘，威爾斯門將犯錯，衝出禁區解圍慢一步，反而撞跌對手，就咁紅牌出場，威記要十人應戰。跟住就被伊朗強攻，捱到 98分鐘終於失守。立即攞返個波再開波想再強攻時，人哋中場截斷立即反攻，98 及 101 分鐘入咗兩球絕殺威爾斯 

A組  卡塔爾 1:3 塞內加爾 

主辦國今日係比揭幕戰時踢得好嘅，但都係未夠水準，差一大截 。塞內加爾41分鐘打開記錄，下半場一開波 48分鐘增添到 2:0。

不過之後竟然都見到卡塔爾一輪十幾廿分鐘嘅大力反撲，在78分鐘終於攻入，成為卡塔爾歷史上第一個入球，唔駛成為 3零部隊！

今年亞洲隊都戰意高昂，看來係受沙地亞拉伯影響。

A組 荷蘭 1:1 厄瓜多爾

荷蘭開波冇幾耐入咗球，之後就成場都係厄瓜多爾攻較主攻。換邊後 49分鐘 E. Valencia 終於追成一比一。 佢更成為咗包辦晒單一國家世盃入球記錄嘅男人！近幾屆世盃佢共為厄國入咗六球，厄國其他球員都未入過波⋯⋯

最大問題係，完場前，佢哋嘅世盃英雄勇戰受傷，要擔架枱出場邊，希望佢OK。

全場射門次數 荷蘭 2:14 厄瓜多爾，可惜佢哋攞唔到三分

B組 英格蘭 0:0 美國

上場大勝6:2， 踢到行雲流水的英格蘭⋯⋯消失咗。

今場反而好似美國隊啲進攻近似樣啲，不過最後兩隊都搵唔到入球。都可算係其中一場悶波⋯⋯

射門次數 8:10， 射中目標只得 4:5⋯⋯


踢完兩場波嘅分數：

A組： 荷、厄 4分，塞 3分，卡0分 
主辦國成為咗今年第一對肯定出局嘅球隊。
另外三隊都仲有機會出線。

B組：英 4分，伊 3分，美 2分，威 1分
四隊都有機會出線/出局，威爾斯最危險。

2022世界盃 - 分組賽第一輪 （Day 5)

 Day 5 , 第一輪比賽最後一日

第一場，G組 瑞士 1:0 喀麥隆 

兩隊實力都一般，其實全場射門次數也不算多，下半場48分鐘瑞士終於把握到機會，球員安保路近門射入一球。但佢入球後舉高雙手表示不想慶祝，原來佢係在喀麥隆出世，年幼時移居歐洲。最後代表成長嘅瑞士出戰世界盃，第一場就對着自己嘅出生地，仲要親自入球贏咗場波。

喀麥隆總教練宋格(Rigobert Song)賽後很有風度的說：「比賽是這公平的，我們只是不同隊，不代表我們不是兄弟。」

H組 烏拉圭 0:0 南韓

兩星期前才受傷及要做手術嘅孫興慜，終於趕及戴面罩上陣。

兩隊互有攻守，射門次數 10:6， 但命中的其實唔多。南韓冇想像中咁體力化，較被動，有幾段時間差啲比烏拉圭攻到失守。

最後兩隊握手言和，熱刺雙子Bentancur & Sonny各為己隊取得一分。

H組 葡萄牙 3:2 加納

其實加納踢得唔差，上半場幾悶下，兩隊都搵唔到幾多攻門機會。

下半場本來加納個勢唔錯，但C朗拿度成功呃咗個十二碼，嗰球我都係覺得只係佢插水多啲。

明明係加納球員掂到個波少少先⋯⋯

呢球十二碼佢自己主射入咗，成為咗有史以來唯一一個連續五屆世界盃都有波入嘅球員。

加納立即強攻，八分鐘後就追返一球，但唔知點解，可能教練想換兩個夠體力嘅前鋒出來再搶分，但卻換走咗入球同助攻嗰兩個。 Andre Ayew 換咗出去，响後備席同隊友擁抱慶祝緊頭先個入波，突然回頭見到已再度落後，兩分鐘後更因為太心急進攻再失多球。

最後再強攻到89分鐘追到 2:3⋯⋯再去到補時最後幾秒發生咗差啲成為經典嘅偷雞事件！

佢躲响守門員後面，等佢放低個波就衝埋去，其實成功咗九成，守門員反應唔切的了，但佢去到個波度唔知係咪太緊張，竟然跣腳⋯⋯就係咁一跣，兩個後衛趕得切回防解圍⋯⋯嚇到C朗個表情！

其實加納呢場真係值得一分嘅，可惜呢下不能完成經典！

G組 巴西 2:0 塞爾維亞

巴西明顯係控制咗比賽嗰隊，但塞爾維亞本來都守得好好下，捱到62分鐘，李察里臣打破局面之後，才開始有啲亂。及後熱刺嘅李察里臣更用心口控高個波，轉身射入一個半倒掛嘅金球，鎖定 2:0 勝局。

尼馬後來受傷要換出，腳踭腫晒，賽後球隊宣布佢踢唔到分組賽餘下兩場。

第一輪踢晒

G組 
巴，瑞 3分，喀、塞 0分

H組 
葡 3分，韓、烏 1， 加 0分

2022世界盃 - 分組賽第一輪 （Day 3-4)

 Day 3

今日開始，一日踢四場，直情係睇波馬拉松

頭場，C組  阿根庭 1:2 沙地阿拉伯

愛隊阿根庭出場，抱住滿心嘅希望睇下佢哋可否大勝一場，上半場早段已得一個十二碼，美斯手操刀射入，連續四屆世界盃有波入。

之後，包括美斯，在上半場再成功射咗個波入網三次，但三次都VAR 睇到越位，越超級之少！其中一球更只係個膀頭越咗少少⋯⋯

沙地阿拉伯竟然完美咁演繹咗越位陷阱，只係上半場，已成功令阿根庭越位咗七、八次⋯⋯

本來仲諗住下半場總有一兩次破到佢越位陷阱，但竟然在五十分鐘左右，畀佢哋兩次反擊，射入咗兩球反超前！ 尤其是第二球，係真係射得好靚⋯⋯ 唉

然後又更主力去防守，攻極都攻唔入⋯⋯雖然補時去到102分鐘才吹完場，但都係爆咗今屆第一場大冷門，輸咗畀沙地阿拉伯⋯⋯

心情跌咗落谷底，第一場冇分，仲要係輸咗畀本來以為最弱嗰隊，出線形勢超級危險。

第二場，D組 丹麥 0:0 突尼西亞

心情極差，無乜心機睇，不過非洲隊突尼西亞比想像中好，兩隊都有射咗十次門左右，但都搵唔到入波，成為了今屆第一場無入球嘅賽事！

睇到丹麥嘅艾歷臣經歷過去年歐國盃差啲死响球場上，現在可以再响世界盃舞台上出現，替他高興！

第三場，C組 墨西哥 0:0 波蘭

兩隊實力都唔差，阿根庭之後一定要嬴晒佢哋兩隊才可以安全出線⋯⋯

波蘭主將當然係利雲度夫斯基，墨西哥就一定要數鎮宇哥奧高查，估唔到上半場就有一個機會睇到佢兩個正面對決！

波蘭得到一個十二碼，由早兩年被譽為比美斯更應該得到金球獎嘅利雲主射，但鎮宇哥一個假身，扮撲右再反身向左飛撲，成功救出咗利雲嘅十二碼！

整場來講，墨西哥攻勢較多少少，但兩隊都把握唔到機會入波，各得一分，呢個可能係對阿根庭最有利嘅結果？真係唔知，得三場波計分，真係乜都可以發生！

C組踢完第一輪，應該冇人估到，榜首係沙地 3, 墨、波 1， 阿0⋯⋯

第四場 D組 法國 4:1 澳洲 

賽前梗係法國隊被睇高一線，但同時佢哋都背負住衞冕冠軍小組賽出局呢個魔咒。

而上半場9分鐘，澳洲一個靚絕嘅攻勢，前鋒Goodwin 窩利射入咗第一球！頓時大家都响度諗，唔通又要爆多一場冷？

不過，法國隊站穩陣腳後，明顯球隊實力比澳洲高一些，上半場已經反超前成 2:1⋯⋯

下半場更趁澳洲強攻時三分鐘內連入兩球，鎖定勝局 4:1

D組 第一輪後，法 3， 突、丹 1， 澳 0


-----------------------------------------------------------------------
Day 4

頭場 F組 摩洛哥 0:0 克羅地亞 

本以為有摩迪座陣，上屆亞軍嘅克羅地亞會技高一籌，不過踢落兩隊相差不遠，大家都把握唔到入波嘅機會，成為本屆第三場 0:0。

上屆64場只得一場係冇入球，估唔到只係四日，就已經出現三場 0:0 了

第二場，E組  德國 1:2 日本

呢場算係暫時最好睇嘅一場，賽前以為可以輕鬆取勝的德國，上半場只能夠藉一個十二碼先開記錄，但之後未能再入一球，反而係日本偶有精彩嘅攻勢。

下半場不久，日本隊中前場各換咗球員之後，進攻力度變得更有效率，多番製造唔少攻勢。

日本守門員更响一次防守，連球四腳勁射力保比數不被拋開。

成隊日本隊嘅戰意、士氣都明顯比德國隊有決心，最後响75及83分鐘得到回報，尤其第二球窄角度勁射破網，睇到大叫咗出來，真係好鬼熱血，好足球小將Feel

德國隊完全無力反攻，最後就爆出咗第二個大冷門，又一支亞洲球隊擊敗傳統勁旅！

完場一刻真係好興奮，大概係被日本隊嗰種士氣及決心感染咗！

第三場，E組 西班牙 7:0 哥斯達黎加

因為接放學及煮飯嘅關係，呢場其實睇下停下，有三四球都係佢入咗先望下，不過真係估唔到今屆嘅哥斯達黎加差到咁樣，3比0 開始好像半放棄一樣，撞着西班牙呢一隊新生代嘅後生仔，完全不留情面，連18歲嘅新金童加維，第一場世界盃比賽就可以入波了。

呢隊西班牙好後生，陣中只係兩三個以往踢過世界盃嘅熟悉名字，但就咁睇呢一場，佢哋又夾得幾好睇，大勝一場應該更加會信心大增！

之後對德國及日本兩場應該都會好精彩！

E組完成第一輪，西、日 3分，德、哥 0分

第四場，F組 比利時 1:0 加拿大

開賽前，當然係估計比利時會處於上風，諗住睇下有迪布尼同埋夏神呢隊比利時係咩貨色。

但開賽不久就有啲唔相信自己對眼，點解係加拿大不停進攻，攻勢都組職得好靚，一次比一次入肉，但射門嘅把握力差咗少少，硬係近門都射唔入。

上半場11分鐘，強攻之下射中後衛左手，得到十二碼，但竟然都射唔入，守門員拍返個波畀佢，又控得唔靚，仲畀衝入來嘅隊人搶咗來射⋯⋯射咗上天⋯⋯！

但一直都係加拿大壓住來攻，比利時過半場嘅機會都少之又少，加拿大射咗超過十球，比利時才射過一腳⋯⋯

但永遠都係好運好過好波，一次反擊，由比利時後衛大腳踢前，前鋒碧舒阿伊一個跑快過兩個後衛少少，半單刀一射入網⋯⋯人哋第二個射門就入球了！

下半場繼續係加拿大猛攻，有好多好多個機會可以追平，其實只要佢哋射門一腳把握得好少少，今場最少都入三四球⋯⋯真係浪費晒啲好靚嘅進攻組織！

全場加拿大射咗22次門，多比利時多一倍有多！可惜就係入唔到網。

咁就比利時袋晒3分，不過加拿大有咁嘅實力，射好啲，對住克羅地亞，摩洛哥都應該有機會攞到分數！

F組第一輪後，比 3， 克、摩 1，加 0 


明天到最後兩組出場，期待睇南韓嘅孫興慜，葡萄牙嘅C朗，巴西隊嘅首場又睇下會唔會爆冷。

---------------------------------------------------------

其實睇波呢個嗜好有時真係幾虐待自己，見到阿根庭出師不利個心真係痛咗兩日。今日睇到日本、加拿大呢啲球隊，又覺得好興奮，精神為之一震！

睇波，尤其是睇世界盃呢啲大型賽事，唔係咁樣場場都睇下，唔會知道成個故事係點發生，好多比賽，你齋睇賽果，係會完全諗錯晒兩隊嘅實力。

可能就係呢種時而虐心，時而興奮的大反差，才可以令咁多球迷着迷。

還是希望今屆是美斯完滿的世界盃旅程，真係好驚會變了巴迪高最後一屆嗰個結局，太令人傷心了⋯⋯

2022世界盃 - 分組賽第一輪 （Day 1-2)

四年一度嘅世界盃又開始咗了，响度寫低少少記錄，等自己老咗都記得下。

今次係有史以來第一次冬天舉行嘅世界盃，唔知會唔會有咩唔同，睇下點

Day 1 （20/11/2022)
揭幕戰，A組 卡塔爾  0:2 厄瓜多爾

賽前好多網上流言話咩卡塔爾出好多錢，呢場買通晒要贏1:0， 不過我始終情願相信呢個世界未去到咁醜惡嘅⋯⋯加上佢哋實力真係未夠班，全場都捱打，輸兩班已經算少。

十分鐘左右嗰球越位值得記錄下，我懶，貼啲圖當記錄咗：

另外，厄瓜多爾比想像中好，A組邊個首名好難估


--------------------------------------------------------
Day 2

B組  英格蘭  6:2 伊朗

估唔到亞洲排名第一嘅伊朗對着英格蘭好似完全冇符咁，去到補時去到100分鐘，班証似乎有啲同情佢哋，畀個十二碼佢哋追多一球⋯⋯

英格蘭踢得令人眼前一亮，不過都係睇埋嗰兩場先，對呢隊伊朗唔作得準。

A組  塞內加爾  0:2 荷蘭

呢場真係好運好過好波，其實我覺得塞內加爾踢得好過荷蘭，不過唔好彩，搞到下半場畀人入波先，最後嗰球強攻不成失多球都冇辦法。荷蘭真係跌得好差，完全唔似強隊⋯⋯

仲有以下呢幕都算經典：

B組  美國 1:1 威爾斯

兩隊各踢咗半場好波，上半場美國係值得領先嘅，下半場威爾斯加強攻勢，有好多球都差啲可以破網。 最後靠一個十二碼追平。 睇見熱刺出身嘅巴爾，終於如願可以帶領威爾斯踢世界盃，仲可以响世界盃入波，嗰球勁射嘅十二碼真係有啲感動！

目前，A組 荷、厄 3分，卡、塞 0分
B組  英 3分 ，威、美 1分，伊 0分

何謂新媒體？

對於何謂「新媒體」，首先新是一個相對的概念，對於傳媒而言，新舊的分界線，從不同角度去會看到不同的定義。

從受眾的感官刺激而言，大概由舊至新的傳媒變化會是如此：
紙媒 > 聲音廣播 > 電影/電視 > 3D/4D 電影 > XR(VR/AR/MR)
由紙張上的文字，到聲音，到黑白影片再變成彩色，立體/超感觀的電影，再到近年日新月異的XR技術。這些都是一代又一代的「新媒體」。目前，我覺得是在一個「前XR時期」，應該有點像七十年代電視技術出現了但未能普及一樣，當XR技術找到一條普及的門路後，大概會有一番現在還想像不到的新景象。

從技術而言，大概「新媒體」這個名詞和電腦（更準確的是互聯網）的普及有著明顯的關係。現在會提的舊/傳統媒體，大概就是互聯網出現前已存在的媒體。這個分水嶺突破了舊媒體的一些技術上的局限，大大提高了傳媒的影響力。接觸到的受眾由以往有地域限制變成無遠弗屆，而且訊息傳播速度變得更實時，多媒體技術更令資訊可以給得更吸引觀眾的目光（動新聞是一個最好的例子）。

但是在網上成長的「新媒體」這廿年間，亦都有兩三代嘅改變。最元祖那些諸如各報章雜誌的網上版、政府/機構/公司的官網、各式其適的入門網站等等，都仍然是有著傳統媒體那個廣播的特性。資訊是單向的，由少數人發佈給大眾。傳媒與受眾之間的角色關係沒有太大的改變，只是傳播途徑電子化數碼化了。

之後進化到一個新階段，就是大家說的Web2.0，新媒體再「變新」了一次，終於打破了傳統媒體那種單向傳播的特質，資訊的產生變得多元，傳播亦變成多向。討論區、網誌、留言板、甚至乎網上遊戲等等這些東西帶給了傳統受眾一個新嘅思想：原來訊息不是單向，大家都可以發表意見一齊討論。傳媒少了那種由上而下的訊息發放權利，進化到去一個要和受眾互動的新階段（當然這一點不是所有傳媒都做得到或做得好的⋯⋯）

後來Facebook,Twitter等社交媒體出現，把新媒體推向了Web3.0的階段。社交媒體可能是一個傳統媒體以前想像不到的一個「新媒體」形式。受眾變得個人化，脫離了Web2.0那種聚眾的特性，而且智能電話的普及，人工智能的大躍進等等，亦是這個Web3.0的催化劑。

响一人一手機（甚至更多）的年代，資訊變得個人化，而且流動性強，人人都可以係記者/KOL，資訊源頭可以是任何人手機上的相機 /鍵盤等等。資訊爆炸推向了一個新高峰。配合發展迅速的AI/ML科技，同一個媒體，不同人去使用都可以見到專為你而設的內容。用電腦去分配、發佈甚至乎產生特定的資訊給個別受眾，是「新媒體」的新特質。

然而，不同的傳媒應該怎樣與時並進，做到真正的媒體轉型或者會有所不同，但作為一個IT人的視點，我覺得現在的「新媒體」是要比以往貼地，要有更敏銳的觸覺去了解觀眾的需要，去接受媒體已不是單向提供資訊娛樂就可以呃到飯食。更重要的是要更貼近日新月異的科技發展，尤其是當傳統優勢那些老本食得七七八八之時，行慢一步就會追唔返人哋的步伐。Google今年只是20週年，Facebook只有14年，YouTube只得13年，但從科技發展的速度來說，這些沒有「傳統」包伏的公司，早已用著飛機甚至火箭級的速度在前進。如果傳統媒體還在原地踏步⋯⋯後果不難想像。

不過更無奈的是，當傳統媒體是條船，就算船長意識到要駛快啲，但如果思維方式不變，跳唔出傳統框框的話，永遠都是會係開住一條船，無可能變到飛機火箭。（唯願條船唔好行錯到去撞冰山，變不成飛機反變沉船⋯⋯)

一個好嘅遊戲嘅元素

題目是別人被問的，看見後有點心癢癢想答，想了兩天，不如用下這個久遺了的網誌。

回正題︰一個好嘅遊戲嘅元素

即是「何為一個好遊戲？」吧。

俗語有云︰戲如人生，人生如戲。
亦有云︰ 人生不過是一場遊戲。

第一句中的戲，當然是指戲劇。 但邏輯上，既然 A=B, B=C，那麼 A=C。

就讓我來一次，以戲寓戲。

戲劇的四大元素︰觀眾、演員、舞台、劇本

套之於遊戲亦然。

觀眾，
是否有一絲奇怪，遊戲又何來觀眾？請細心想一想，一個好遊戲，絕對能吸引局外人觀賞。
運動類︰只說足球，區區廿多人在球場內，可以全球數以億計人作為觀眾。
棋藝類︰圍棋、象棋、橋牌甚至德州撲克，懂欣賞的，作為觀眾亦能緊張刺激。
遊戲類︰實體如大富翁、虚疑如一眾電玩（在機舖就算只係單人玩的太鼓之達人，只要有高手在玩，定必圍滿大批觀眾），只要是好遊戲，必定有能吸引觀眾的特質。
就像近年席捲亞洲的韓國綜藝節目Running Man，不用多說好遊戲如何吸引目光吧？

當然，在遊戲世界，觀眾沒有在戲劇世界般重要。 但絕對是一個好遊戲與否的指標。


演員，
在遊戲世界，即是參與者（如玩家、評判、公証人⋯⋯）。
和演員一樣，遊戲的參與者最重要是認真。一個多好的遊戲，如果不認真參與，怎樣也不會好玩的。
先不說玩家，其他遊戲的參與者，諸如評判、球証、司線員、主持等等，還要多一份專業。
例子︰一場球賽如果球証頻頻誤判，絕對影響了整個賽事中的所有人，包括觀眾。

至於玩家，排除那些天生就不適合玩遊戲的少數人（即是那些根本唔想玩的人⋯⋯），應該絕大部份的人成為玩家之時都會有最低限度嘅「認真」，但能否留低他們的心，讓玩家進一步投入，樂在其中呢？還看之後的兩個元素了。

舞台，
遊戲的舞台，就是遊戲的硬件。
大如野外定向的整個山頭、足球場， 小如一個棋盤、一粒骰、一隻棋子、幾隻字，甚至只是玩家的聲音。

凡遊戲，就算是單人遊戲，都需要一定的道具、場地。而這些觸摸得到，看得到的東西，往往就是能否吸引玩家的第一步。

而每一件硬件，都足以影響遊戲的好玩度、難度、投入度、公平度⋯⋯等等。
骰子用6面骰還是12面骰？一粒還是兩粒？
圍棋棋盤為何是縱橫十九路？
RPG 遊戲用的棋子、模型為何做得那麼精緻那麼貴亦有人買？
網球為何如增加鷹眼技術？

所以一個好遊戲必定要一些能配合的硬件。


劇本
劇本劇本，一劇之本。一齣戲劇如果劇本爛，有多好的觀眾、演員、舞台都無補於事。
遊戲亦都需要一份好劇本，就是遊戲的規則。

劇本好壞主要都是時、地、人及故事的起承轉合的分別。

遊戲的規則亦然。
時︰需否有時間限制？總時長？每回合的時長？
地︰要在哪個環境下進行？
人︰參與人數的限制？一隊合力完成？分兩、三、四隊互相較勁？
起︰遊戲開始時的狀態，要先分好錢、牌之類？各玩家要企的位置？
承︰遊戲的流程，輪流每人一步的回合制？各玩家一起行動的實時遊戲？
轉︰遊戲的高潮，遊戲有沒有可變的玩法？局局不同的隨機元素？
合︰遊戲的結果，怎樣分勝負？犯規的代價？

而好的遊戲規則，我覺得應該要︰
易了解，太複雜的規則往往令人卻步。
平衡，試想像如果大富翁加一張機會咭是「其他玩家立即破產」會如何？
公平，所有玩家依同一套規則，某程度上可犯規，但亦要付出規則列明的代價。
具挑戰性，不論是單人遊戲的挑戰自己，或多人遊戲的挑戰對手。有必勝方法的遊戲最差。
開心，說到底玩遊戲都係尋開心，如能令每個玩家都在過程樂在其中，勝利只是Bonus，就最好不過。

2014巴西世界盃－四強

四強兩場比賽，變得入球數一天一地，真始料不及！

巴西 1：7 德國

作為主辦國，入到四強，勢估不到會這樣大敗一場！怎有可能未夠三十分鐘就輸到0：5！

八強傷了尼馬，及隊長施華停賽真的打亂了步署，結果迎來了比50年馬拉簡拿之恥更慘的大敗！看見巴西球迷的傷心表情，真令人同情！

荷蘭 0：0 阿根庭

一場沒有比數但卻很好看的四強。講真，很多年沒有見過防守做得這麼好的阿根庭。

美斯及洛賓這兩位球隊的主力都被釘得沒有多少次控球的機會。一場很高水準的防守戰！

終於要十二碼分勝負，今次因為有球員受傷用了些換人名額，荷蘭未能再換入守門員。

結果在第一，三輪射失下，只踢了四輪就分了勝負！

作為忠實的阿根庭球迷，勝出的一刻真的有點激動，事隔廿四年，再一次可以看見愛隊踢決賽了！心情很緊張！

季軍戰，巴西 0：3 荷蘭

本以為季軍戰巴西會踢回一點爭氣波，可惜三分鐘不夠就給洛賓搏到個十二碼。先落後的巴西又一次變得進退失據⋯⋯最後再輸一場3：0，連蛋也破不了⋯⋯可惜！

2014巴西世界盃－八強

進入八強，變成只得返歐洲和美洲隊各四隊。

法國 0：1 德國

法國隊分組賽對瑞士一仗的攻勢完全消失了，德國的攻勢亦不太凌厲，最後只能少勝一球。

巴西 2：1 哥倫比亞

巴西因為七分鐘就先開記錄，整場都帶住哥倫比亞踢，最後哥隊只能後上追近至1：2。

阿根庭 1：0 比利時

又是一場早開記錄的比賽，最後阿根庭憑九分鐘的一球順利進級！

荷蘭 0：0 哥斯達黎加

哥斯達黎加真的守得滴水不漏，荷蘭攻力不夠。

整場的亮點是荷蘭教頭在120分鐘換入後備守門員告魯爾守十二碼！結果救出兩球助球隊進級！

2014巴西世界盃－十六強

首先，十六強缺少了幾支歐洲球隊有點令人失望，西班牙，意大利，英格蘭呢三隊冇咗，少咗好多話題，同埋好多球迷心都碎了。

好先貼賽果︰

巴西 1：1 智利

講真，巴西這場早該出局了，只是智利把握不到機會。能夠進級只因巴西有個好的守門員在十二碼大戰救出兩球！

哥倫比亞 2：0 烏拉圭

少了蘇亞雷斯，就算科蘭幾落力，始終年紀太大。加上咬人事件好像令成隊士氣低落。加上占士洛迪古斯繼續神勇，梅開二度，個人第五球，領先射手榜！

十六強八場入面，呢一場最一面倒！

荷蘭 2：1 墨西哥

呢場有點球迷奇遇記，整場都是墨西哥踢得好好多，荷蘭完全走樣！但竟然戲劇性地在88分鐘追成平手，更在幾分鐘內，補時就完前洛賓疑似插水地搏得一十二碼把墨西哥淘汰！

哥斯達黎加 1：1 希臘

這場有點異曲同工，又是整場都是哥斯達黎加踢得好些，但卻被希臘90+1分鐘時追成平手！加時互冇記錄後又一場十二碼分勝負。

令人驚訝的是，加時後半段已見兩隊球員體力不繼，但十二碼的水準奇高，腳腳都是靚射門，只係基羅拿華斯神勇球出一球而已！

法國 2：0 尼日利亞

尼日利亞又一次讓人失望，每次入到十六強就像放軟手腳一樣，今次賽前又傳出因為未出糧罷操練！這樣的士氣去踢淘汰賽，只是益了法國隊罷了！

德國 0：0 阿爾及利亞 （加時 2：1）

這場我還以為德國會輸掉！完全有點老鼠拉龜的感覺，九十分鐘內找不到入球的方法！反而對方有幾次反擊有點危險，只是把握力太差。但防守就真係一流。

不過加時兩分鐘突然打破了僵局，才開始控制了局面最後2：1不用射十二碼。

阿根庭 0：0 瑞士 （加時 1：0）

兩隊都防守穩健，瑞士更是主守，很緊張的比賽。

全場都被緊釘的美斯，去到加時的最後一刻，終於有一個機會突破幾個球員，在禁區頂妙傳迪馬利亞建功，險勝一球。美斯更破記錄成為連續四場的最有價值球員！

比利時 0：0 美國 （加時 2：1）

90分鐘內互有攻守，但都是未能得分。最後成為十六強入面第五場要加時的比賽！

有點像德國那場，加時一開波三分鐘比利時打破僵局，去到105，107分鐘更每邊入多球，美國最後都要輸一球。

整體來說，十六強都是著重防守的比賽，淘汰階段大家都變得很小心！

2014巴西世界盃－分組賽

今年世界盃其間比較忙，一直沒有時間寫下任何東西，趁著今晚決賽在即，都是要把握時間把今年的記憶留下來。

先說說分組賽，因為比賽時間是00：00，03：00，06：00 （及有一場09：00）最終有好幾場都是捱不住眼瞓，或在工作中錯過了的。

就逐組寫一點點印象深刻的啦。

A組，其實克羅地亞踢得不差，只可惜巴西有點主場運，墨西哥又真係發揮得太好了。其實看巴西分組賽的表現，真係有點貨不對辦，只是在主場球迷打氣下踢高一線罷了。

 B組，最難忘當然是第一輪分組賽荷蘭反超前西班牙4：1，大概全世界都沒有人料到上屆決賽的戲碼會有一個這麼嚇人的賽果。最痛心是見到一代鋼門卡斯拿斯錯漏百出，令人感嘆！

西班牙第二場還要輸了給智利，成為首支確定出局的球隊，作為衛冕球隊，可算是最差的結果！

智利表現都唔錯，值得闖入十六強。其實澳洲每一場都很落力，可惜都是三戰全敗！

C組，哥倫比亞今年紅了一個超新星，占士洛迪古斯，看看之後哪個大球會能該他發光發熱。

希臘和科特迪瓦都只是踢得一般，希臘尾場只不過是完場前得到個問題十二碼才把科特迪瓦踢出局，可憐杜奧巴就咁要離開呢個世盃舞台！

可惜因為時間問題，幾場日本隊的賽事都沒有怎麼看，好像第一場對科特迪瓦踢得不錯的，只是杜奧巴後備入場後改變了局面罷了。

D組，賽前已被喻為死亡之組，但我想大家都只是說烏拉圭，意大利及英格蘭三隊爭餐死。

誓估唔到，最後竟然是哥斯達黎加勇奪小組首名！

論表現，哥斯達黎加真是全組最後，甚至整屆32強入面，分組賽防守最出色都一定要數埋佢哋。

英格蘭，第一場反輸了給意大利後，第二場還輸埋給烏拉圭，提早出局，又一次令支持者失望⋯⋯

意大利第一場踢得好好的，但第二場輸了給防守更好的哥斯達黎加，落得要在尾輪同烏拉圭爭第二名的田地。

烏拉圭，真係成也蘇亞雷斯敗也蘇亞雷斯。第三輪要必勝的情況下，呢位仁兄又一次發狂咬了意大利後衛基亞連尼一啖⋯⋯當時球証看不到，球隊還入多一球反超前，順利進級十六強。

但呢一咬，卻在賽後被罰停賽九場，兼禁止參加一切足球活動四個月⋯⋯影響了整支球隊，更白白浪費了一個十六強的名額。可憐意大利隊，又一次分組賽出局！

E組，兩支歐洲球隊出線非常正路，不過法國除了對瑞士爭首名一場踢得特別好之外，另外兩場都只是一般。瑞士明明防守很好，卻會在最後一場被法國少炒了2：5！

厄瓜多爾其實都唔錯，對法國那場有機會唔止拿一分的。一勝一和一負其實算有交代。

洪都拉斯應該都係志在參與罷了。

F組，首名其實大概全世界都是預料阿根庭穩奪，只是原來沒有想像中容易，尤其對伊朗一場要到90分鐘才由美斯射入一球全取三分。美斯三場入四球，總算一吐上兩屆世盃表現不佳的烏氣。但面對全力防守的對手時，都是有點吃力，不過整體來說，雖然沒有甚麼大勝仗，但全隊的狀態是一場比一場好。

伊朗真是令人眼前一亮，不過可能密集的賽程亞洲球隊有點支持不住，第三場未能緊接第二場的氣勢，輸了給波斯尼亞。

波斯尼亞其實都有迪斯高等球星，只可惜頭兩場全失六分，早早出局。

尼日利亞，真係好想講，呢隊非洲雄鷹呢幾屆啲波都係好鬼悶！！

G組，呢組都是死亡之組，不過都冇估到第一場德國可以大炒葡萄牙4：0！雖然一直都不喜歡C朗，但睇完呢場波真的覺得他很可憐，佢幾好技術都好，國家隊班隊友水皮成咁，真係幾無奈！

德國其實第一場可以大炒，感覺上只係對方踢得太差，甚至對加納那場還要先落後再追和。

美國踢得幾好，最後奇連士文都係輸咗畀德國隊。

加納其實很落力，加上上屆世界盃八強那個慘劇（加時完場前蘇亞雷斯用手護空龍，十二碼卻射失，最後連十二碼大戰都輸埋⋯⋯），有好多同情分，可惜最後一場後勁不繼。

H組，呢組算係睇得最少，比利時貴為歐洲新貴，全取9分可算輕輕鬆鬆。

阿爾及利亞可算是法國的二隊，一勝一和一負是值得的分數。

俄羅斯有點讓人失望，下屆的主辦國，大概跟住的四年要好好練下兵了。

韓國好像沒有早幾屆那麼好體能了，朴智星一代退役後好像有點水準下降。再加上可能亞洲隊不太適應南美的天氣，四隊亞洲隊都未能突圍入十六強。

分組賽踢完後，十六強形勢如下︰