2022世界盃 - 十六強（Day 14）荷蘭v美國、阿根庭v澳洲

荷蘭 3:1 美國

被睇高一線嘅荷蘭，反而係踢穩守突擊嗰隊，其實美國隊反而係攻勢較多。

如果把握力好一點，比賽初段嗰球大好機會可以入咗領先，結果可能好唔同。

全場攻門次數 12(6):17(6)

5分鐘有波射唔入，10分鐘荷蘭得一個攻門就得手了，美國隊後防未夠經驗，睇唔實對方。

入咗波之後美國攻咗一陣，場波就開始有啲悶，一邊主守，另一邊又攻唔入。

正當以為悶悶哋1:0完上半場時，補時階段荷蘭又入多一球一模一樣咁嘅波，美國隊後衛同一個位置睇漏人被拉開比數到2:0完場⋯⋯

BBC英語旁述當時都講咗句類似咁嘅嘢：They forced the opponent asleep, then wake up themselves and punish them. 

連佢哋都覺得係催眠戰術，哈哈。

下半場其實美國都好多機會，都係把握力太差，去到76分鐘，竟然係一個奇怪嘅跣腳情況下，後踭撞高咗個波，笠死咗荷蘭守門員，追成1:2， 好好笑。

即刻緊張咗，佢哋士氣大振，滿意為仲有十幾分鐘，有可能追平有加時睇⋯⋯

點知唔夠五分鐘，又一次响禁區睇漏一個橙衫，近門射成3:1⋯⋯啱啱嗰啲士氣即刻冇晒⋯⋯

最後亦都3:1完場，荷蘭晉級8強。

美國隊分組賽踢得唔差，但今場好似啲球員唔夠力咁，唔知係咪比賽太密回唔到氣。相反荷蘭隊以守為主嘅踢法可能慳力好多。

阿根庭 2:1 澳洲

澳洲隊整體合作非常出色，好有紀律，防守得非常好，阿根庭搵咗半個鐘，35分鐘，美斯又好神奇咁把握到一個機會射穿幾個後衛破網。

上半場連番進攻，都只係呢個機會領先1:0。

呢一球係美斯職業生捱第1000場比賽，第789個入球。同時係今屆世盃第3球，累積世界盃入球數第9球，超越咗馬勒當拿嘅8球，只差一球就追平傳奇巴迪斯圖達10球嘅阿根庭記錄！

下半場57分鐘，澳洲隊回傳畀門將，迪保羅&艾拉維斯兩個好勤力咁衝埋去夾擊，最後艾拉維斯成功搶咗佢腳下球，射成2:0。

之後其實阿根庭仲有好幾個黃金機會，美斯三次成功引開啲後衛，妙傳畀後備入替嘅拿達路馬天尼斯，佢竟然全部射唔入，最空嗰球竟然連門框都射唔中，真係激死人！ 

賽後網上畀人叫佢做希古恩2.0⋯⋯又令人想起8年前決賽希古恩近門射失嗰一腳⋯⋯

77分鐘，澳洲禁區外遠射，省中攔截嘅安素費蘭迪斯改變方向入網，追成1:2

跟住變得緊張，澳洲隊士氣大增，加上前鋒馬天尼斯浪費咗再次拉開比數嘅機會，澳洲有兩個攻門都九成機會可以追平，好彩後衛利辛度馬天尼斯準確地响六碼位置瞓身飛鏟擋咗第一球

臨完場仲有一球超級危險，好彩今次到門將伊美利安奴·馬天尼斯極速出迎封位，擋下咗呢個近門施射！

前面嘅馬天尼斯浪費機會，好彩後面兩個馬天尼斯力保不失，有驚無險2:1完場，再進一步，8強迎戰經典對手荷蘭！

98年八強輸咗畀柏金最後一腳，14年四強最後12碼贏返佢一次入決賽，今次八強再相遇，點都會係一場硬仗！

希望美斯繼續一步一步走到兩個星期後捧起大力神盃！

2022世界盃 - 分組賽完結

分組賽咁快就踢晒，亦即係已踢咗48場波，我只係得澳洲對突尼西亞嗰場完全冇睇，其他47場可算有睇晒！ 今屆係最後一次 32隊 64場波，好想試下盡量睇到幾多場就幾多場。 

下屆 48隊，多達80場波，真係應該冇乜可能睇得晒⋯⋯

講返今屆，十六強出爐：

歐洲：8隊，荷克英法波西葡瑞
亞洲：3隊，日韓澳
南美：2隊，阿根庭、巴西
中北美：1隊，美國
非洲： 2隊，塞內加爾、摩洛哥

今次亞洲有三隊入到十六強，令人驚喜，而且5/6 有贏過波，6隊全部都有入過波添！

講開入波，今屆水平好似拉近咗，32隊全部都有入球！ 
得兩隊係0分，咁多組冇一組有9分嘅球隊！

十六強，傳統強隊都分得幾平均，試下估兩set八強

正路咁估：
荷蘭 vs 阿根庭
克羅地亞 vs 巴西
英格蘭 vs 法國

西班牙 vs 葡萄牙 

四場戲碼都好似好正咁！

但純粹個人希望嘅八強呢？

美國vs 阿根庭
日本vs 韓國

英格蘭vs法國
西班牙vs葡萄牙 

約粹個人喜好，我覺得美國今年踢得好睇過荷蘭，同埋好想睇日韓响世界盃舞台交手！

今屆賽程好密，明天就開始十六強第一日，仲有十六場波，十個比賽日，唔知今年有幾多場要加時甚至射十二碼呢？

決賽會係 阿根庭對英格蘭 定係 真係會 美斯 C朗 一決高下呢？

好緊張呀！

2022世界盃 - 分組賽第三輪 （Day 13）G,H組

 H組先踢，賽前係6-3-1-1格局，1分嘅韓國同烏拉圭，分別都要贏波先有機人田一日爭次名，3分嘅加納就和都有機會。

烏拉圭 2:0 加納

呢個對碰當然會諗係2010年八強，120分鐘蘇亞雷斯用手護空門，紅牌出場後，加納射唔入十二碼，後來仲輸埋十二碼大戰。應該全加納都憎阿蘇到今日。

最戲劇性嘅係，上半場20分鐘，加納响禁區搏到十二碼！

等咗十二年，再一次有機會射烏拉圭十二碼，但睇得出主射嘅隊長安祖艾耶超級緊張！佢應該明白，嗰一刻全國嘅人都期待緊佢射入⋯⋯佢窒步咁跑埋去，射得唔算大力，加上守門員捉到路，飛撲拍出咗個波隊友幫手解圍！

之後上半場未完，就畀烏拉圭攻入咗兩球落後 0:2。

當時係烏拉圭升咗上第二位，踩咗半隻腳入十六強⋯⋯待續

韓國 2:1 葡萄牙

韓國同樣係一定要贏，但對住換咗六個球員嘅葡萄牙仍然係好大壓力。開波五分鐘，仲大意畀人傳入禁局近門射入，落後0:1！

不過去到27分鐘，孫興慜開角球，混中C朗個背脊彈咗個波返龍門口，超靚咁助攻金英權瞓身射咗個波入網追平1:1！

7號C朗，肩背位置一彈

完美助攻金英權，今次唔駛睇VAR都肯定佢有掂到個波了！

半場 1:1 返更衣室，得一分未夠出線，烏拉圭2:0，韓國只要入多一球，就同得四分，得失球差大家都係0， 但韓國隊入波較多會排第二！

下半場繼續互有攻守，全場攻門 13(6):12(5) 都幾緊張，但時間一分一秒咁過，眼看就夠鐘，孫興慜起過幾腳射門都畀門將球出⋯⋯

啱啱90分鐘進入補時階段嘅一刻，葡萄牙開出角球，小禁區爭頂完個波彈咗去崎角位嘅孫興慜腳下，眼看前面冇乜敵人，佢大步就向前推進⋯⋯

同時所有葡萄牙球員一齊跑回防，孫仔一路帶波去到禁區頂前後比七個人圍住射唔到門，但望到唯一衝到上來接應，後備入替嘅黃喜燦，响佢啱啱未越位嗰一刻，通埋人哋坑渠咁傳咗個波出去。

傳得洽到好處，黃喜燦亦把握到呢個機會一射破網！我都睇到大叫咗出來！

之後葡萄牙餘下嗰幾分鐘補時都想追返，但韓國隊成功守住勝局！

但因為另一邊霜仲未完場，當時只要烏拉圭入多一球，就會得失球差較佳升上第二。

仲有五六分鐘補時，換咗出去後備席嘅蘇亞雷斯由知道韓國反超前後已坐立不安，烏拉圭傾全力反攻。而當時如果加納入到兩球追和的話，就到佢哋升上第二！

呢幾分鐘兩隊快到好痴線，守到人哋個攻勢，立即又快速反擊，你來我往咁，超級刺激！

兩邊都有差一點就入嘅射門，去到補時最後一分鐘，卡雲尼帶波衝入禁局，疑似被加納球員撞跌，不過可能佢太似一撞就跌，球証好肯定咁示意唔係十二碼，加納球員繼續帶波進攻。

但睇返慢鏡其實佢要判十二碼都冇話可說。但球証好相信自己，VAR室亦沒有叫佢番睇，就係咁樣，維持咗2:0 嘅結果完場，加納可以話攬實咗烏拉圭一齊出局！

完場雞聲一響，烏拉圭球員衝晒埋去同球証理論，仲有人食咗黃牌，但呢個時候，點投訴都冇用了。

後備席上嘅阿蘇忍唔住痛哭， 可能加納球迷會有一點安慰？不過其實我幾鍾意蘇亞雷斯，不過兩隊只能活一隊，實有一邊有人傷心咁離開⋯⋯

另一邊，鏡頭影到成班韓國職球員圍在一起睇手機直播，等另一場完場，十分緊張！

當另一場一吹雞，全隊狂喜，隊長孫興慜頂住連續三屆小組出局嘅壓力終於爆出來，哭成淚人！

足球比賽就係如此令人動容！尤其看到以下嗰啲相，真係好鬼Touching！

普帥係佢熱刺嘅伯樂，佢幫BBC做嘉寳都勁開心！

最後，葡萄牙、韓國一齊出線十六強！

之後夜場到 G組，一模一樣係 6-3-1-1 格局。

6分嘅巴西明顯出二隊等主力休息嚟近戰得1分嘅喀麥隆。

另一邊3分嘅瑞士和都大機會，塞內加爾就一定要贏波搶夠4分。

喀麥隆 1：0 巴西

巴西出晒副選都好，其實都係勁多球星，基本上都係壓住嚟攻，但喀麥隆守門員及後衛做到嘢，一直力保不失。

全場攻門 7(3):20(8)，偏偏就係臨完場畀喀麥隆頂入咗一球，巴西想追返已冇乜時間了。

不過當時另一邊瑞士領先緊，有6分，喀麥隆贏咗都要出局⋯⋯所以入球嘅Vincent Aboubakar 都唔理自己已經有黃牌响身，照除衫慶祝，之後球証就等佢哋慶祝完，笑笑口咁畀多將黃牌佢，兩黃一紅，成為今屆第二位紅牌出場嘅球員！

瑞士 3:2 塞內加爾

呢場就刺激好多，拳拳到肉。大家都估喀麥隆贏唔到巴西，所以呢兩隊應該係邊個贏就好大機會出線。

20分鐘 瑞士沙基利先入一球
26， 35分鐘  塞爾維亞入咗兩球反超前，爬上第二位

44分鐘 瑞士又追和，上返第二

下半場一開波不久，更再入多球反超前 3:2，有6分，巴西7分。

最後，嗰邊喀麥隆領先，其實瑞士係同巴西同得6分，得失球差巴西仲多一球。

如果瑞士/喀麥隆 入多一球，巴西就會變咗小組第二！

最後都冇呢件事發生，巴西順利首名同埋瑞士一齊出線。

2022世界盃 - 分組賽第三輪 （Day 12）E,F組

早場先係 F組，開賽前呢組係 4-4-3-0 格局

克羅地亞 0:0 比利時 

3分排得三嘅比利時，呢場係要贏先有機會出線，不過見唔到佢哋有明顯嘅優勢。

未夠二十分鐘，還在禁區來踢跌對手，被判十二碼，不過後來VAR話有越位再先，十二碼冇得射。但嗰個越位⋯⋯真係有啲無言，真係越咗幾多呢呵？

但克羅地亞今場啲進攻都沒有太大威脅，上半場悶悶哋0:0。

下半場都係大相伯仲，係去到尾段比利時終於比較積極，多咗一啲都好大機會射入嘅埋門機會，但係都一一畀佢哋嘅前鋒盧卡古浪費晒，一球中柱唔怪得佢，但有兩三球只係兩三碼，一係頂高咗，一係就冇力畀守門員接咗。

比利時嘅黃金一代，就係咁樣，在世界舞台退場了。

克羅地亞和咗都可以次名出線。

加拿大 1:2 摩洛哥

其實真係踢得唔差嘅加拿大，可惜最後一場都攞唔到分。

摩洛哥上半場已攻入兩球，攞住保險球，袋實六分，超級安全。

上半場尾段，加拿大靠對方一球烏龍球追到接近啲1:2

下半場，加拿大都仲好想攞一分嘅，不過真係攻唔入，射門都唔多。

全場射門次數 5(0):6(2)，可見根本就冇乜起腳機會

完場一刻摩洛哥好開心，歷史性踢入16強，仲要係小組首名！

尾場就到E組

同時睇住兩場波，估唔到刺激成咁！呢組跟時間線咁寫好睇啲。

賽前係4-3-3-1 格局，任何一隊都可以出線/出局

0' - 西班牙首名，日本次名

10' - 德國1:0 哥斯達黎加，4分爬咗上第二，得失球差多日本一球
12' - 西班牙 1:0 日本，西班牙7分，日本變咗 3分

HT- 上半場完，兩邊都好似好正路，估唔到下半場一開波就峰迴路轉！

48' - 日本追平1:1， 變返4分，得失球差同德國一樣，得球都一樣，對賽贏德國，所以日本變第二

51' - 日本反超前2:1， 三笘薰搏到盡响個波出底線前嗰一刻傳中，田中碧近門撞入。VAR，慢鏡睇咗好耐，球証們都係判嗰波未出晒底線，入球有效！

呢一個moment一定會成為世界盃歷史嘅其中一個經典。

咁樣，日本6分升上第一，西班牙4分第二 得失球 +6，德國4分第三 得失球 0

58' - 哥斯達黎加追平1:1！變咗4分升咗上第三 得失球 -6， 德國2分 包尾

70' - 哥斯達黎加 2:1！變咗6分，升咗上第2， 西班牙第3⋯⋯

如果係呢個比數完場，晉級嘅係日本及哥斯達黎加，西班牙及德國出局！真係嚇一大跳！

73' - 德國回過神來，追返平 2:2， 哥斯達黎加變返4分 第三名，德國2分包尾。

85' - 德國再入一球 3:2， 又變返4分爬返上去第三，但得失球差得 0， 想出線，一係自己入多六球，一係就希望西班牙追和日本

同時間，日本好努力咁守住西班牙嘅攻勢，而且仲偶有一些差啲得手嘅快速反擊！

兩場波，四隊都踢得到盡晒力！兩場都好睇！

90' - 德國再入一球 4:2， 但得失球仲差西班牙五球⋯⋯

兩邊完場 

日本 2:1 西班牙

德國 4:2 哥斯達黎加

應該冇乜人會相信呢組會係日本榜首，仲要係兩場反勝，搞掂咗兩隊傳統勁旅！

網上搵到一啲圖片同呢組有關，貼上來做個記錄：

呢個實驗幾好，易啲理解角度唔同係會睇到條線同個波仲有冇掂到

恭喜日本再次晉級十六強！ 

十六強戲碼：

日本  vs 克羅地亞

摩洛哥 vs 西班牙

2022世界盃 - 分組賽第三輪 （Day 11）C,D組

 D組 

法國 0:1 突尼西亞

法國本身六分在手，加上得失球差多3分嘅澳洲好多，幾乎一定首名出線，今仗嘅正選十一人全部都係之前未出過場嘅，連守門員都換埋。

上半場冇乜特別嘅攻門，0:0。下半場58分鐘，突尼西亞成功射入今屆第一個入波。而且仲變咗四分，爬過澳洲暫列小組次名。

不過後來幾分鐘後澳洲入波，球迷及後備席都充滿失望表情。

失波後法國有換返幾個正選入來追，去到補時第8分鐘，接近完場時基士文射入咗一球，現場本已接受咗出局命運嘅球迷，諗住贏返場波攞個安慰獎都幻滅埋⋯⋯

不過突然球証要去睇返VAR，發現原來越位在先，看見看台上啲觀眾嗰種失而復得嘅反應，都替他們高興。 

澳洲 1:0 丹麥

這組本來最支持有艾歷臣、小舒米高同埋靴爾堡嘅丹麥隊，估唔到佢哋表現咁差，幾場都冇乜攻擊力。

反而澳洲幾令人驚喜，第一場先入法國波，只係後來輸返轉頭。對突尼西亞嗰場，睇返啲評論，都覺得佢哋啲球員好積極，值得佢哋贏波攞到3分。

呢場對丹麥都係，澳洲球員整體做得好好，更加順利搵到一個入球，同法國隊同得6分，一齊晉級十六強。

之後到D組嘅比賽

阿根庭 2:0 波蘭

波蘭隊基本上主守為主，空有一個近年其中一個世界級神射手利雲度夫斯基，但冇其他人幫到佢，今場佢都唔知有冇正式射過門。

全場射門次數係 24(12):3(1) ，控球比係 73:27， 基本上係一面倒⋯⋯

但佢地全軍防守，加上守門員施捷斯尼多次神級撲球，上半場一直未有入球。

39分鐘，佢跳起想打走個波時，美斯快少少頂走咗個波，佢不慎打中咗美斯塊面。其實個波都頂走咗响底線方向，佢隻右手才打中美斯，作為阿根庭球迷，我都認為唔會有十二碼⋯⋯

點知球証去睇完VAR竟然判十二碼！咁諗住有運，美斯可以連續三場有波入⋯⋯點知施捷斯尼竟然又一個神撲球，擋出咗美斯其實射得唔算差嘅十二碼。今屆世界盃佢第二次擋出十二碼！成功保住上半場 0:0 完場。

但下半場開波，唔夠一分鐘，第一個攻勢，馬體會嘅摩連拿右路大力地波傳入禁區，白禮頓今季踢得好好嘅麥阿里士打一腳射去遠柱下角中柱入網！

67分鐘，上場入波功臣安素助攻曼城嘅艾華利斯，佢接波推右一步就勁射破網，撞開至2:0。

其實全場美斯有三四次攻門都看似必入，但都畀守門員神勇咁救咗，如果唔係佢，波蘭應該會大敗一場，保唔住小組次席⋯⋯

墨西哥 2:1 沙地亞拉伯

賽前墨西哥只得1分，沙地有3分，墨西哥知道要大勝才有機會出線。

上半場已不斷攻門，全場統計攻門次數 26(10):10(2)，戰情相當激烈。

因為上半場補時較另一場多，下半場他們較遲開波，當時阿根庭已領先一球，墨西哥要贏4球才可以得失球力壓波蘭。

一開波47分鐘，Henry Martin一個好遠嘅罰球勁射破網，今屆第二球罰球入波，比昨天英格蘭嗰球更靚！

52分鐘更在門前近門攻入第二球，距離目標更進一步。

其實墨西哥今場還有兩三次射咗個波入網，不過沙地嘅越位陷阱真係幾成功，幾次入咗波都越位無效！

後來波蘭輸到0:2， 墨西哥同佢同得4分，得失球差都係0， 大家都係攻入兩球，對賽又打和，去到要用Fair Point分名次，波蘭因為黃牌少幾張所以仍然係第二！

墨西哥用最後嗰廿幾分鐘只想入多一球，或者希望阿根庭幫手入多球⋯⋯

不過波蘭門將神勇守住冇再失波到完場，當時呢場仲有四分幾鐘。墨西哥不停嘗試攻門，去到補時最後一分鐘竟然畀沙地一次反擊得手，比數變成1:2，佢哋亦都知道無力挽了。

就係咁，沙地成功攬住墨西哥一切出局，亦都打破咗墨西哥每次決賽週都可以晉身淘汰階段嘅紀錄⋯⋯佢哋之前七屆都係十六強畢業嘅⋯⋯

或者，大家最唔捨得嘅就係墨西哥嘅守門員，第五次世界盃嘅奧祖亞Ochoa，除咗因為佢似吳鎮宇，佢每屆都會有令人印象心刻嘅表現！

雖然阿根庭第一場輸比沙地嚇大家一跳，仲令36場不敗嘅紀錄斷咗攬，不過總算最後都順利以小組首名出線，十六強暫時避開同法國硬碰。

十六強戲碼：

法國 vs 波蘭 （如果波蘭竟然可以守到去互射十二碼就可以睇下ccc尼係咪咁威）

阿根庭 vs 澳洲  （本來估計係對丹麥，唔知對澳洲係咪真係易踢啲。）

2022世界盃 - 分組賽第三輪 （Day 10）A,B組

 今日開始，雖然都仲係踢四場，但因為同時間踢嘅關係，唔需要再睇八個鐘波了，冇咗早場，有啲失落。

先係A組

荷蘭 2:0 卡塔爾

都係冇咩奇蹟出現，卡塔爾成為歷來最低分出局嘅主辦國，0分，好彩嘅係佢哋都叫做入過一球波，唔駛做3零部隊。

頭廿幾分鐘兩隊都有互相進攻下，到26分鐘卡塔爾終於失守。下半場一開波更加未回過神來就輸多一球，荷蘭好簡單就保住小組首名。

厄瓜多爾 1:2 塞內加爾

塞內加爾少分啲，今場一定要贏先得，所以佢哋先主攻，去到上半場尾段得到十二碼，成功領先完半場。

厄瓜多爾追和就可以晉級，全力反撲，去到67分鐘，終於搵到入球，而且今次唔再係華倫西亞入波，佢嗰個一人包辦全國所有世界盃入球嘅狀態完咗。

佢哋勁開心咁慶祝，但竟然開返波唔夠一分鐘，就被對方再入一球⋯⋯雙方球迷的心情都係坐過山車一樣。

最後再追唔返嗰一球嘅差距，厄瓜多爾結束今次旅程，塞內加爾小組第二晉級

之後到B組

英格蘭 3:0 威爾斯

賽前，威爾斯要贏波，再希望另一場和波才有機會出線。上半場兩邊都搵唔到入球，英格蘭射門較有威脅，但都係把握唔到。半場0:0。

下半場50分鐘，華舒福在禁區頂射入咗今屆世界盃第一球直射入網嘅罰球！終於打破缺口。

一分鐘後，威爾斯球員回傳失誤，哈利簡尼搶到皮球，妙傳入禁區，科頓射成2:0。

威爾斯想攻入一球都難，68分鐘華舒福有少少獨食之下禁區內扭咗幾下，射成3:0。

之後英格蘭仲夠本錢提早廿分鐘收起部份主力，畀其他球員出下場。

3:0 完場，威爾斯完成咗佢哋等咗好多年嘅世界盃之旅。英格蘭首名出線，十六強對塞內加爾。

美國 1:0 伊朗

伊朗上場贏咗威爾斯，今場其實和波都夠出線，但美國隊強攻至38分鐘搵到佢哋需要嘅一個入球，伊朗之後不停想進攻，都換來好多美國反擊嘅驚險刺激鏡頭。

臨完全伊朗球員响禁區好易跌，但球証幾次都覺得無需判十二碼，最後伊朗都追唔返，僅以一球飲恨，緣盡今年世界盃。

美國一勝一和一負得 4分，小組第二名晉級，十六強對 荷蘭。