牛皇慶祝宴

已經開工做了有好幾個月的一個工作，
最近終於收到訂金了，真是久旱逢甘露。
為了慶祝終於收到這筆錢，我們公司決定要去大吃一餐。

就在公司樓下的那間牛皇星，由一間舖開到兩間，
由新開張無人識，到現在是香港其中一間以食牛肉聞名的店，
但是這兩年來，我們卻一次都沒有光顧過。

一來是它只做晚市，我們又好少會夜晚一起食飯，
就算會一起食，也必定是留在公司趕工，又怎會去食火鍋。
二來這間已薄有名氣的店，傳聞中比較貴。

不過今次收了錢，於是大家第一時間就決定要去食一餐試試。
食火鍋太少人很難叫東西吃，於是我們叫埋女友呀，老婆呀咁，
再加埋不太有關的同事兩名，最後就有十一人一起食啦。

訂了七時半，我是先落去拿位的一員，
被安排了在舊舖的閣樓，本來見樓梯舊舊地驚環境冇咁好，
但行到上去又別有洞天！原來都好乾淨好四正！
於是打電話告訴其他人我們在二樓(慣左上一層當二樓)，
怎料他們下來後說找不到我們？！
突然醒起，新舖那邊都有閣樓喎，於是我便下去找他們。
但過到新舖那邊，上到閣樓，又不見他們的行踪，
正當我問伙計的時候，竟然見到他們從後門的電梯出來！
原來新舖這邊除了閣樓外，樓上二樓四樓也是他們的！！
每天放工在樓下都會看到一大班人在等位，
想不到他們已擴張營業到這個地步！！

一早收到風，食海鮮類的東西會超貴，所以我們完全忽略店員的各種海鮮建議，
她好落力呀，我每點一道菜，她就介紹一款海鮮，哈哈，我們才不中計！
當然首先主打是叫了牛皇星最出名的牛肉啦，
在網上做了功課，叫招牌肥牛時懂得叫雪花牛邊肉！
雖然大碟的要148元一碟，但一見到那些雪花肥牛個樣，
就覺得這個價錢都可以接受了，再試食一塊，大家都忍不住讚好！
還有那個108元的牛柳粒，切得成一個個小立方體的，
食落口感好好，又多肉汁，都是招牌必食之選。

還有一碟叫牛姜的東西，伙計說是牛的筋位，
可惜我們第一次食，煮得太夠，變得唔夠爽，
應該是快手焯一焯就食，可能都唔錯。

當然還叫了火鍋必叫的丸呀，菜呀，山根金菇之類的，
其中有一個墨魚滑，很好食，我們還加單叫多個蝦滑，都唔錯。

不過牛柏葉就超唔抵了，幾十元得幾塊葉！
我從來未見過牛柏葉是一塊塊葉上的……
雖然，真係好爽，但係就真係超級唔抵食。

牛肉就真係一流，我們還加單叫多了一碟大肥牛，
再加試埋那碟牛脷根，都幾好食，爽口的。

那兒的飲品只係得竹蔗馬蹄水或者啤酒，
我們十一個人前後飲左四壼竹蔗水，見那些伙計咁落力問我們要唔要，
都估到一定貴啦，最後原來一壼60元左右，都算啦。

服務方面就一般啦，開頭就好落力，不停推介海鮮，
但後來睇得出我們不會叫海鮮好就有點放棄，
但總算有求必應，只是叫牛展時售罄了冇得試。

唯一一個要話下的，是最後突然拿兩碟橙來，
但我們從來沒有表示食完！不過都估到是他們的想客快些走的招數，
尤其想起每晚樓下都要等位，只係放低兩碟橙，
沒有冷言冷語都算係咁，勉強原諒佢。

最後埋單，十一個人一千九百幾，
每人都不用二百元，比傳聞中要約250元一位來得平，
可能因為我們有一半是女士，食量較少啦。
(不過另一個傳聞是，叫海鮮的話，平均每人要500)

如果有咁上下多人，又大家都喜歡食牛的話，
這間牛皇星真係值得一試！正！