2022世界盃 - 分組賽第三輪 （Day 10）A,B組

 今日開始，雖然都仲係踢四場，但因為同時間踢嘅關係，唔需要再睇八個鐘波了，冇咗早場，有啲失落。

先係A組

荷蘭 2:0 卡塔爾

都係冇咩奇蹟出現，卡塔爾成為歷來最低分出局嘅主辦國，0分，好彩嘅係佢哋都叫做入過一球波，唔駛做3零部隊。

頭廿幾分鐘兩隊都有互相進攻下，到26分鐘卡塔爾終於失守。下半場一開波更加未回過神來就輸多一球，荷蘭好簡單就保住小組首名。

厄瓜多爾 1:2 塞內加爾

塞內加爾少分啲，今場一定要贏先得，所以佢哋先主攻，去到上半場尾段得到十二碼，成功領先完半場。

厄瓜多爾追和就可以晉級，全力反撲，去到67分鐘，終於搵到入球，而且今次唔再係華倫西亞入波，佢嗰個一人包辦全國所有世界盃入球嘅狀態完咗。

佢哋勁開心咁慶祝，但竟然開返波唔夠一分鐘，就被對方再入一球⋯⋯雙方球迷的心情都係坐過山車一樣。

最後再追唔返嗰一球嘅差距，厄瓜多爾結束今次旅程，塞內加爾小組第二晉級

之後到B組

英格蘭 3:0 威爾斯

賽前，威爾斯要贏波，再希望另一場和波才有機會出線。上半場兩邊都搵唔到入球，英格蘭射門較有威脅，但都係把握唔到。半場0:0。

下半場50分鐘，華舒福在禁區頂射入咗今屆世界盃第一球直射入網嘅罰球！終於打破缺口。

一分鐘後，威爾斯球員回傳失誤，哈利簡尼搶到皮球，妙傳入禁區，科頓射成2:0。

威爾斯想攻入一球都難，68分鐘華舒福有少少獨食之下禁區內扭咗幾下，射成3:0。

之後英格蘭仲夠本錢提早廿分鐘收起部份主力，畀其他球員出下場。

3:0 完場，威爾斯完成咗佢哋等咗好多年嘅世界盃之旅。英格蘭首名出線，十六強對塞內加爾。

美國 1:0 伊朗

伊朗上場贏咗威爾斯，今場其實和波都夠出線，但美國隊強攻至38分鐘搵到佢哋需要嘅一個入球，伊朗之後不停想進攻，都換來好多美國反擊嘅驚險刺激鏡頭。

臨完全伊朗球員响禁區好易跌，但球証幾次都覺得無需判十二碼，最後伊朗都追唔返，僅以一球飲恨，緣盡今年世界盃。

美國一勝一和一負得 4分，小組第二名晉級，十六強對 荷蘭。

2022世界盃 - 分組賽第二輪完成後積分表

 

A組，下場荷蘭對卡塔爾，厄對塞

除非卡塔爾大勝荷蘭，然後另一場打和，咁就荷蘭出局。

現實啲諗，只係厄及賽爭入十六強，荷蘭九成九都晉級！

B組，下輪 英威兄弟大戰，另一邊就美伊戰爭

威爾斯唯一嘅出線生機，就係自己贏英格蘭，另一場打和，如果只係少勝一兩球，仲可以同英格蘭一齊出線添。或者就大勝英格蘭四球，咁就唔駛理另一場戰果，踢走埋英格蘭。

美伊就簡單，兩隊都一定要贏先確保出線。

C組，最後係 1對 2， 3對4
波蘭就和都安全
阿根庭就贏就首名，和呢就要睇下另一場沙地有冇失分，或者墨西哥係咪贏少過三球。
沙地其實贏咗都一定出線，和就危險啲
墨西哥就會全力爭取大勝一場 

呢組係四隊都仲有可能出線/出局！

D組，最後係 法國對突尼西亞，澳洲對丹麥

法國已一定出線，突尼西亞要贏得夠多，同另一場要澳洲失分先得
澳洲和就其實都安全，突尼西亞都唔似會响法國身上攞到分⋯⋯
丹麥要出線就一定要贏澳洲了。

E組，下場係西班牙對日本，德國對哥斯達黎加

兩場都係，贏嘅就晉級，德國就要睇埋日本會唔會贏西班牙 
哥斯達黎加得失球好差，要晉級都係要贏德國先掂

日本第二輪一分都攞唔到，令自己响一個好危險嘅情況⋯⋯
德國會唔會再一次小組出局？要睇下西班牙下場有幾盡力。

F組，下場 克羅地亞對比利時，摩洛哥對加拿大

加拿大已出局，睇下佢會唔會手攬位摩洛哥。摩洛哥要一分已經安全。
比利時一定要贏先可以出線，克羅地亞和都OK了。

G組，下場 巴西對喀麥隆，瑞士對塞爾維亞 

巴西已一定出線，睇下喀麥隆有冇機會搶返三分。
瑞士打和嘅話就要睇下對面有冇爆冷。
塞爾維亞要贏多少少，以防要同喀麥隆計得失球。

H組，最後一輪賽事，葡萄牙對韓國，加納對烏拉圭

葡萄牙已經上岸，加納和咗就要睇下南韓有冇爆冷。
南韓同烏拉圭都係一定要贏，最好係大勝再同人哋鬥得失球。

都希望韓國繼上屆最後一場贏德國一樣，今次可以爆冷贏葡萄牙！


*********************************************************************************
用咗九日，已經踢咗32場波，即係一半了。 

今屆各隊間嘅差距好似拉近咗，好多組都有爆冷賽果出現，非洲，亞洲球隊有唔少都成功贏過波搶到分！ 

第二輪過後，竟然只有三隊確保16強席位：法國、巴西、葡萄牙
提早確定出局的竟然只有兩隊： 主辦國卡塔爾、下屆主辦國之一嘅加拿大

但，卡塔爾都搵到一個入球，加拿大仲入咗本屆最快嘅入波，仲踢得非常之好！

紅牌只出現過一張威爾斯守門員出迎禁區外撞跌對手，另外仲有一張係畀咗韓國個領隊⋯⋯

暫時得兩個球員入咗三球，法國麥巴比，厄瓜多爾華倫西亞

未見到有人成功自由球射入網 

今屆補時補得好足，平均都補六分鐘以上，好多都補十分鐘，更見過補十五分鐘！

還有一半嘅比賽，希望繼續精彩，最好就係美斯成功得償所願！

2022世界盃 - 分組賽第二輪 （Day9) G、H組

頭場，G組 喀麥隆 3:3 塞爾維亞

估唔到呢場會刺激成咁！ 比數係咁樣進展嘅：

1:0
1:2
HT
1:3
3:3

喀隊一開始主動出擊，好多攻勢，更先入一球，但去到44分鐘開始有啲分心，補時一分鐘被追平，過多兩分鐘更加被反超前到 1:2 完半場！

半場出來，喀隊好似未收拾心情，塞軍繼續進攻，53分鐘領先到 3:1， 大家都覺得喀麥隆散咗，呢場輸硬之際，佢哋又突然醒返咁，超積極反攻對手。更响63，66分鐘，短時間內追平 3:3！

眼看佢哋趁呢個氣勢繼續搶攻，可惜最後都未能全取三分，不過以兩隊嘅精彩表現，各後一分都無可厚非。

H組 韓國 2:3 加納

因為孫興慜所以支持韓國隊，但老孫真係未在狀態，好似幫唔到球隊好多。

但都估唔到會先失波，仲要連續失兩次高空爭頂，上半場落後 0:2。

估唔到戲劇性地，好似頭場一樣，58，61分，短短兩三分鐘內，靚仔中鋒曹圭成連續回敬返兩個超靚嘅頭槌攻門，追平返 2:2 ！

之後孫興慜都試過嘗試射門，但會次對方都早有準備响前面封晒啲位。曹圭成都有機會用腳入返球，可惜差少少。

68分鐘更加因為後防睇漏一個，被對手禁區來起腳得手，再領先 3:2。

之後就算係咁狂攻，攻門次數去到 20(6):7(3) 都未能再追平⋯⋯

希望最後一輪孫興慜可以開齋入返球波，爆多次冷擊敗葡萄牙！

G組 巴西 1:0 瑞士

冇咗尼馬嘅巴西隊，進攻更加悶，加上瑞士隊又缺乏有威協的進攻，但防守做得好好，所以上半場好悶咁 0:0。 

下半場 64分鐘巴西入咗一班，不過VAR 睇返，係前兩個傳球已經有人越位，入球無效。

以為瑞士大難不死，但都係捱唔到完場，83分鐘都係要失守，卡斯美路禁區內接應傳球快腳射成 1:0。 

就係咁，悶下悶下咁就完場，但係巴西就攞到六分可以確保出線。

H組 葡萄牙 2:0 烏拉圭

開場見到烏拉圭正選出卡雲尼，加埋葡萄牙嘅C朗，兩個最近嘅曼聯7號對疊。

兩隊全場都有超過次射門，其實場波互有攻守都幾好睇，上半場0:0得來都算OK。

下半場54分鐘，B費南迪斯禁區外斬入去畀C朗爭頂，皮球入咗網。C朗立即勁開心咁慶祝。

但睇返慢鏡，佢邊度有掂到個波⋯⋯頭髮尖掂到都當佢射入？ 

過咗十幾分鐘，連官方都覺得唔對路，改返入球嘅係B費。

後來見形勢都安全，82收鐘收起幾個主力，包括C朗。

去到補時階段得到一個問題十二碼，明明個後衛跌落地，隻手响下想支撐跌緊嘅身體，個波射中咗隻手，理應唔算犯規，因為佢冇任何意識去犯手球。但球証睇完VAR 都竟然判咗球十二碼，B費操刀，梅開二度，但咁就打沉咗烏拉圭一直努力想入返球嘅決心。

就咁樣 2:0 完場

兩輪後，嘅積分形勢
G組 巴 6分，瑞 3分，喀、塞 1 分    
H組 葡 6分，加 3分，韓、烏 1 分

後記： 
賽後，有記者影到C朗响官方表示自己有掂到個波，好想個入球計返畀佢⋯⋯見到啲相都覺得尷尷尬，好似有啲核突囉⋯⋯

貼返啲網圖作為記錄

2022世界盃 - 分組賽第二輪 （Day8) E,F組

 E組  日本 0:1 哥斯達黎加

日本以上場反勝德國嘅氣勢，一開賽就想主攻上場大敗比西班牙 0:7 嘅哥斯達黎加。

可惜今場換咗啲球員，有啲進退失據。相反哥隊可能有反省過上場嘅表現，今場踢得進步咗啲，最少防守上做得好咗。

全場 日本攻門 14(3):4(1)， 但偏偏人哋81分鐘唯一一次射中框嘅埋門，就入咗波⋯⋯剩返十幾分鐘畀佢哋狂攻，但幾次門前失機之後，全失三分，下場要嬴到西班牙就可以出線，但談何容易！

F組 克羅地亞 4:1 加拿大

上一場加拿大對比利時踢得好好，可惜一分都攞唔到。今場一開波，一分半鐘就快速攻入咗第一球！嗰種熱血沸騰嘅感覺，好替佢哋高興！

不過克羅地亞始終大賽經驗豐富，貴為上屆嘅亞軍，用咗少少時間站穩陣腳，上半場尾段突然連入面球反先 2:1。

加拿大下半場都沒有放棄，都不停進攻，可惜技不如人，球賽節奏明顯克羅地亞控制得好好。

去到70分鐘，克羅地亞攻入第三球，又係佩歷錫Perisic 嘅妙傳，把記錄拉開。 

90+4' 嗰球已經非戰之罪，加拿大全軍進攻想追近比數，但一個反擊就如入無人之境⋯⋯

加拿大兩場全敗，0分，篤定出局，希望佢下場踢得好啲，期待四年後佢哋以主辦國之一嘅身份再出現响世界盃嘅舞台！

F組 比利時 0:2 摩洛哥

其實今年的比利時真係踢得唔好，上場贏加拿大只屬好運，今場摩洛哥絕對踢得好過佢，上半場大家都入唔到波。

下半場73分鐘，摩洛哥終於搵到入球。比利時想追都冇乜力，到補時再輸多球，0:2完場。

上場賽後，迪布尼攞到MOTM時都話唔明自己差過加拿大啲球員，點解畀個獎佢⋯⋯更直言比利時今年冇可能爭冠軍，大老了。相信佢唔係因為兼虛，係真心話來⋯⋯

E組 西班牙 1:1 德國

日本隊頭場竟然一分都冇，已經球返德球一隻腳出來。呢場大戰可算係超高水準嘅攻防戰，互有攻守。

西班牙控球率達 64%，但並未出現上場大勝七比零嗰種氣勢。德國隊間歇性找到機會都能制造一些緊張反攻。但一直互無進帳。

西班牙到62分鐘，後備入替嘅佐迪艾巴助攻莫拉達近門入波，年青嘅西班牙隊都係要靠兩個老將打破缺口。不過拉唔開記錄，德國隊83分鐘由後備入替嘅富克洛大腳射入追平。

尾段大家都好想全取三分，但都係冇人成功，最後各得一分，大家都仲有可能晉級或者出局⋯⋯


兩輪過後，積分榜形勢
E組： 西 4分，日、哥 3分，德 1分
F組： 克、摩 4分，比 3分，加 0分

後記：
賽後比利時隊存出內訌嘅消息，貼幾張網圖作為記錄

2022世界盃 - 分組賽第二輪 （Day7) C、D組

 Day 7 - C，D 組第二輪

D組 突尼西亞 0:1 澳洲

呢場出咗街，係唯一一場一眼都冇睇過⋯⋯
睇返數據，攻門 13(4):7(2) ，澳洲上半場把握到機會攻入咗致勝嘅球，又多一隊「亞洲」球隊嬴波。

係呀，澳洲轉咗去參加亞洲足協都差唔多廿年了⋯⋯

C組 波蘭 2:0 沙地亞拉伯

第一場超水準爆冷反勝阿根庭嘅沙地，其實今場都踢得唔差，控球、攻門次數9(3):16(5)都比波蘭多，只係把握力冇人哋咁好。

39分鐘波蘭少有嘅攻門做成入波，上半場補時階段沙地得到球十二碼，但射唔入，守門員捉到路，皮球彈出來補射卻射高出⋯⋯

久攻不下，最後82分鐘被波蘭反擊，利雲度夫斯基入一球，成2:0， 當今其中一個頂級射手，終於响世界盃入波，佢自己入完開心到減咗出來！

沙地最後破唔到蛋，今場搶唔到分。

D組 法國 2:1 丹麥

上半場大家都有乜攻勢，0:0。

下半場61分鐘麥巴比先入一球，丹麥七分鐘後追平。

戰至86分鐘，麥巴比梅開二度為法國攞夠六分，肯定晉級16強。

C組 阿根庭 2:0 墨西哥

上半場面對墨西哥嘅重兵防守，阿根庭一個致命嘅機會都搵唔到，面對輸咗就要出局嘅壓力，睇嘅都勁擔心！

下半場，其實狀況只係改善咗少少，但都係久攻不下，間唔中仲要小心對方嘅反擊。

64分鐘，美斯接應迪馬利亞傳球，响禁區外，廿幾碼左右嘅位置，睇準兩個後衛中間少少嘅空位，勁射一個割草式地波，轟入咗龍門嘅右下角！

入波嗰一刻，我自己都激動到喊咁滯！擔心咗幾日，終於鬆一口氣！

當然一球嘅差距仲係提心吊膽，直至87分鐘，美斯傳波，安素費南迪斯，避過一個守衛，一個妙射，彎去遠柱入網！ 差唔多就同上一場沙地入第二球嘅射法一樣！

終於都順利全取三分，心頭大石先放下一半，下場對波蘭仍然係要嬴波先安全！

過咗兩輪，積分形勢
C組  波 4分，阿、沙 3分， 墨 1 分

D組 法 6分，澳3分，丹、突 1分 

賽後好多關於美斯嘅貼圖，我儲起咗啲，貼响呢度留下念先： 

2022世界盃 - 分組賽第二輪 （Day6) A、B組

 Day 6

第二輪分組賽開始，今日係A, B組共四場

B組 威爾斯 0:2 伊朗

第一場大敗 2:6 之後，大家都以為伊朗今場都勝算不高。不過可能吸取咗上場的教訓，加上球員們响國內暴政發聲，聲援國來被鎮壓嘅民眾一事，佢哋嘅國家機器當然冇咁順攤。最少今日迫到班球員要郁下個口扮唱國歌⋯⋯有啲現場觀眾見到忍唔住喊！

場波其實兩邊都唔係好做到危機，反而伊朗有啲攻門似樣啲，有一球先中右柱，彈出再補射中埋左柱，再彈出，仲有機會補射多腳，卻射中咗個守門員⋯⋯

到86分鐘，威爾斯門將犯錯，衝出禁區解圍慢一步，反而撞跌對手，就咁紅牌出場，威記要十人應戰。跟住就被伊朗強攻，捱到 98分鐘終於失守。立即攞返個波再開波想再強攻時，人哋中場截斷立即反攻，98 及 101 分鐘入咗兩球絕殺威爾斯 

A組  卡塔爾 1:3 塞內加爾 

主辦國今日係比揭幕戰時踢得好嘅，但都係未夠水準，差一大截 。塞內加爾41分鐘打開記錄，下半場一開波 48分鐘增添到 2:0。

不過之後竟然都見到卡塔爾一輪十幾廿分鐘嘅大力反撲，在78分鐘終於攻入，成為卡塔爾歷史上第一個入球，唔駛成為 3零部隊！

今年亞洲隊都戰意高昂，看來係受沙地亞拉伯影響。

A組 荷蘭 1:1 厄瓜多爾

荷蘭開波冇幾耐入咗球，之後就成場都係厄瓜多爾攻較主攻。換邊後 49分鐘 E. Valencia 終於追成一比一。 佢更成為咗包辦晒單一國家世盃入球記錄嘅男人！近幾屆世盃佢共為厄國入咗六球，厄國其他球員都未入過波⋯⋯

最大問題係，完場前，佢哋嘅世盃英雄勇戰受傷，要擔架枱出場邊，希望佢OK。

全場射門次數 荷蘭 2:14 厄瓜多爾，可惜佢哋攞唔到三分

B組 英格蘭 0:0 美國

上場大勝6:2， 踢到行雲流水的英格蘭⋯⋯消失咗。

今場反而好似美國隊啲進攻近似樣啲，不過最後兩隊都搵唔到入球。都可算係其中一場悶波⋯⋯

射門次數 8:10， 射中目標只得 4:5⋯⋯


踢完兩場波嘅分數：

A組： 荷、厄 4分，塞 3分，卡0分 
主辦國成為咗今年第一對肯定出局嘅球隊。
另外三隊都仲有機會出線。

B組：英 4分，伊 3分，美 2分，威 1分
四隊都有機會出線/出局，威爾斯最危險。

2022世界盃 - 分組賽第一輪 （Day 5)

 Day 5 , 第一輪比賽最後一日

第一場，G組 瑞士 1:0 喀麥隆 

兩隊實力都一般，其實全場射門次數也不算多，下半場48分鐘瑞士終於把握到機會，球員安保路近門射入一球。但佢入球後舉高雙手表示不想慶祝，原來佢係在喀麥隆出世，年幼時移居歐洲。最後代表成長嘅瑞士出戰世界盃，第一場就對着自己嘅出生地，仲要親自入球贏咗場波。

喀麥隆總教練宋格(Rigobert Song)賽後很有風度的說：「比賽是這公平的，我們只是不同隊，不代表我們不是兄弟。」

H組 烏拉圭 0:0 南韓

兩星期前才受傷及要做手術嘅孫興慜，終於趕及戴面罩上陣。

兩隊互有攻守，射門次數 10:6， 但命中的其實唔多。南韓冇想像中咁體力化，較被動，有幾段時間差啲比烏拉圭攻到失守。

最後兩隊握手言和，熱刺雙子Bentancur & Sonny各為己隊取得一分。

H組 葡萄牙 3:2 加納

其實加納踢得唔差，上半場幾悶下，兩隊都搵唔到幾多攻門機會。

下半場本來加納個勢唔錯，但C朗拿度成功呃咗個十二碼，嗰球我都係覺得只係佢插水多啲。

明明係加納球員掂到個波少少先⋯⋯

呢球十二碼佢自己主射入咗，成為咗有史以來唯一一個連續五屆世界盃都有波入嘅球員。

加納立即強攻，八分鐘後就追返一球，但唔知點解，可能教練想換兩個夠體力嘅前鋒出來再搶分，但卻換走咗入球同助攻嗰兩個。 Andre Ayew 換咗出去，响後備席同隊友擁抱慶祝緊頭先個入波，突然回頭見到已再度落後，兩分鐘後更因為太心急進攻再失多球。

最後再強攻到89分鐘追到 2:3⋯⋯再去到補時最後幾秒發生咗差啲成為經典嘅偷雞事件！

佢躲响守門員後面，等佢放低個波就衝埋去，其實成功咗九成，守門員反應唔切的了，但佢去到個波度唔知係咪太緊張，竟然跣腳⋯⋯就係咁一跣，兩個後衛趕得切回防解圍⋯⋯嚇到C朗個表情！

其實加納呢場真係值得一分嘅，可惜呢下不能完成經典！

G組 巴西 2:0 塞爾維亞

巴西明顯係控制咗比賽嗰隊，但塞爾維亞本來都守得好好下，捱到62分鐘，李察里臣打破局面之後，才開始有啲亂。及後熱刺嘅李察里臣更用心口控高個波，轉身射入一個半倒掛嘅金球，鎖定 2:0 勝局。

尼馬後來受傷要換出，腳踭腫晒，賽後球隊宣布佢踢唔到分組賽餘下兩場。

第一輪踢晒

G組 
巴，瑞 3分，喀、塞 0分

H組 
葡 3分，韓、烏 1， 加 0分

2022世界盃 - 分組賽第一輪 （Day 3-4)

 Day 3

今日開始，一日踢四場，直情係睇波馬拉松

頭場，C組  阿根庭 1:2 沙地阿拉伯

愛隊阿根庭出場，抱住滿心嘅希望睇下佢哋可否大勝一場，上半場早段已得一個十二碼，美斯手操刀射入，連續四屆世界盃有波入。

之後，包括美斯，在上半場再成功射咗個波入網三次，但三次都VAR 睇到越位，越超級之少！其中一球更只係個膀頭越咗少少⋯⋯

沙地阿拉伯竟然完美咁演繹咗越位陷阱，只係上半場，已成功令阿根庭越位咗七、八次⋯⋯

本來仲諗住下半場總有一兩次破到佢越位陷阱，但竟然在五十分鐘左右，畀佢哋兩次反擊，射入咗兩球反超前！ 尤其是第二球，係真係射得好靚⋯⋯ 唉

然後又更主力去防守，攻極都攻唔入⋯⋯雖然補時去到102分鐘才吹完場，但都係爆咗今屆第一場大冷門，輸咗畀沙地阿拉伯⋯⋯

心情跌咗落谷底，第一場冇分，仲要係輸咗畀本來以為最弱嗰隊，出線形勢超級危險。

第二場，D組 丹麥 0:0 突尼西亞

心情極差，無乜心機睇，不過非洲隊突尼西亞比想像中好，兩隊都有射咗十次門左右，但都搵唔到入波，成為了今屆第一場無入球嘅賽事！

睇到丹麥嘅艾歷臣經歷過去年歐國盃差啲死响球場上，現在可以再响世界盃舞台上出現，替他高興！

第三場，C組 墨西哥 0:0 波蘭

兩隊實力都唔差，阿根庭之後一定要嬴晒佢哋兩隊才可以安全出線⋯⋯

波蘭主將當然係利雲度夫斯基，墨西哥就一定要數鎮宇哥奧高查，估唔到上半場就有一個機會睇到佢兩個正面對決！

波蘭得到一個十二碼，由早兩年被譽為比美斯更應該得到金球獎嘅利雲主射，但鎮宇哥一個假身，扮撲右再反身向左飛撲，成功救出咗利雲嘅十二碼！

整場來講，墨西哥攻勢較多少少，但兩隊都把握唔到機會入波，各得一分，呢個可能係對阿根庭最有利嘅結果？真係唔知，得三場波計分，真係乜都可以發生！

C組踢完第一輪，應該冇人估到，榜首係沙地 3, 墨、波 1， 阿0⋯⋯

第四場 D組 法國 4:1 澳洲 

賽前梗係法國隊被睇高一線，但同時佢哋都背負住衞冕冠軍小組賽出局呢個魔咒。

而上半場9分鐘，澳洲一個靚絕嘅攻勢，前鋒Goodwin 窩利射入咗第一球！頓時大家都响度諗，唔通又要爆多一場冷？

不過，法國隊站穩陣腳後，明顯球隊實力比澳洲高一些，上半場已經反超前成 2:1⋯⋯

下半場更趁澳洲強攻時三分鐘內連入兩球，鎖定勝局 4:1

D組 第一輪後，法 3， 突、丹 1， 澳 0


-----------------------------------------------------------------------
Day 4

頭場 F組 摩洛哥 0:0 克羅地亞 

本以為有摩迪座陣，上屆亞軍嘅克羅地亞會技高一籌，不過踢落兩隊相差不遠，大家都把握唔到入波嘅機會，成為本屆第三場 0:0。

上屆64場只得一場係冇入球，估唔到只係四日，就已經出現三場 0:0 了

第二場，E組  德國 1:2 日本

呢場算係暫時最好睇嘅一場，賽前以為可以輕鬆取勝的德國，上半場只能夠藉一個十二碼先開記錄，但之後未能再入一球，反而係日本偶有精彩嘅攻勢。

下半場不久，日本隊中前場各換咗球員之後，進攻力度變得更有效率，多番製造唔少攻勢。

日本守門員更响一次防守，連球四腳勁射力保比數不被拋開。

成隊日本隊嘅戰意、士氣都明顯比德國隊有決心，最後响75及83分鐘得到回報，尤其第二球窄角度勁射破網，睇到大叫咗出來，真係好鬼熱血，好足球小將Feel

德國隊完全無力反攻，最後就爆出咗第二個大冷門，又一支亞洲球隊擊敗傳統勁旅！

完場一刻真係好興奮，大概係被日本隊嗰種士氣及決心感染咗！

第三場，E組 西班牙 7:0 哥斯達黎加

因為接放學及煮飯嘅關係，呢場其實睇下停下，有三四球都係佢入咗先望下，不過真係估唔到今屆嘅哥斯達黎加差到咁樣，3比0 開始好像半放棄一樣，撞着西班牙呢一隊新生代嘅後生仔，完全不留情面，連18歲嘅新金童加維，第一場世界盃比賽就可以入波了。

呢隊西班牙好後生，陣中只係兩三個以往踢過世界盃嘅熟悉名字，但就咁睇呢一場，佢哋又夾得幾好睇，大勝一場應該更加會信心大增！

之後對德國及日本兩場應該都會好精彩！

E組完成第一輪，西、日 3分，德、哥 0分

第四場，F組 比利時 1:0 加拿大

開賽前，當然係估計比利時會處於上風，諗住睇下有迪布尼同埋夏神呢隊比利時係咩貨色。

但開賽不久就有啲唔相信自己對眼，點解係加拿大不停進攻，攻勢都組職得好靚，一次比一次入肉，但射門嘅把握力差咗少少，硬係近門都射唔入。

上半場11分鐘，強攻之下射中後衛左手，得到十二碼，但竟然都射唔入，守門員拍返個波畀佢，又控得唔靚，仲畀衝入來嘅隊人搶咗來射⋯⋯射咗上天⋯⋯！

但一直都係加拿大壓住來攻，比利時過半場嘅機會都少之又少，加拿大射咗超過十球，比利時才射過一腳⋯⋯

但永遠都係好運好過好波，一次反擊，由比利時後衛大腳踢前，前鋒碧舒阿伊一個跑快過兩個後衛少少，半單刀一射入網⋯⋯人哋第二個射門就入球了！

下半場繼續係加拿大猛攻，有好多好多個機會可以追平，其實只要佢哋射門一腳把握得好少少，今場最少都入三四球⋯⋯真係浪費晒啲好靚嘅進攻組織！

全場加拿大射咗22次門，多比利時多一倍有多！可惜就係入唔到網。

咁就比利時袋晒3分，不過加拿大有咁嘅實力，射好啲，對住克羅地亞，摩洛哥都應該有機會攞到分數！

F組第一輪後，比 3， 克、摩 1，加 0 


明天到最後兩組出場，期待睇南韓嘅孫興慜，葡萄牙嘅C朗，巴西隊嘅首場又睇下會唔會爆冷。

---------------------------------------------------------

其實睇波呢個嗜好有時真係幾虐待自己，見到阿根庭出師不利個心真係痛咗兩日。今日睇到日本、加拿大呢啲球隊，又覺得好興奮，精神為之一震！

睇波，尤其是睇世界盃呢啲大型賽事，唔係咁樣場場都睇下，唔會知道成個故事係點發生，好多比賽，你齋睇賽果，係會完全諗錯晒兩隊嘅實力。

可能就係呢種時而虐心，時而興奮的大反差，才可以令咁多球迷着迷。

還是希望今屆是美斯完滿的世界盃旅程，真係好驚會變了巴迪高最後一屆嗰個結局，太令人傷心了⋯⋯

2022世界盃 - 分組賽第一輪 （Day 1-2)

四年一度嘅世界盃又開始咗了，响度寫低少少記錄，等自己老咗都記得下。

今次係有史以來第一次冬天舉行嘅世界盃，唔知會唔會有咩唔同，睇下點

Day 1 （20/11/2022)
揭幕戰，A組 卡塔爾  0:2 厄瓜多爾

賽前好多網上流言話咩卡塔爾出好多錢，呢場買通晒要贏1:0， 不過我始終情願相信呢個世界未去到咁醜惡嘅⋯⋯加上佢哋實力真係未夠班，全場都捱打，輸兩班已經算少。

十分鐘左右嗰球越位值得記錄下，我懶，貼啲圖當記錄咗：

另外，厄瓜多爾比想像中好，A組邊個首名好難估


--------------------------------------------------------
Day 2

B組  英格蘭  6:2 伊朗

估唔到亞洲排名第一嘅伊朗對着英格蘭好似完全冇符咁，去到補時去到100分鐘，班証似乎有啲同情佢哋，畀個十二碼佢哋追多一球⋯⋯

英格蘭踢得令人眼前一亮，不過都係睇埋嗰兩場先，對呢隊伊朗唔作得準。

A組  塞內加爾  0:2 荷蘭

呢場真係好運好過好波，其實我覺得塞內加爾踢得好過荷蘭，不過唔好彩，搞到下半場畀人入波先，最後嗰球強攻不成失多球都冇辦法。荷蘭真係跌得好差，完全唔似強隊⋯⋯

仲有以下呢幕都算經典：

B組  美國 1:1 威爾斯

兩隊各踢咗半場好波，上半場美國係值得領先嘅，下半場威爾斯加強攻勢，有好多球都差啲可以破網。 最後靠一個十二碼追平。 睇見熱刺出身嘅巴爾，終於如願可以帶領威爾斯踢世界盃，仲可以响世界盃入波，嗰球勁射嘅十二碼真係有啲感動！

目前，A組 荷、厄 3分，卡、塞 0分
B組  英 3分 ，威、美 1分，伊 0分