父親節 -- 自助餐

媽媽不知在甚麼地方購物
換來了一些自助餐優惠卷

上星期五...父親節前的星期五
便當提早慶祝的去食自助餐

還同埋契爺一家一起去
又，因為單數的關係
最後叫埋樑仔去呢

九龍富豪酒店
自助餐都冇話咩特唔特別
香港地間間酒店的自助餐都是一樣的罷
魚生，生蠔都是例牌被搶的對像
那兒還多了一樣--軟殼蟹天婦羅....

以208的價錢來說
已算很平的了
何況媽媽的優惠卷更是
二人同行收一人錢的....

全場最給引我的
反而是甜品部那個朱古力噴泉
一些溶了的朱古力
不停的給流下來
給大家放生果入去
很簡單就變成朱古力生果了！

但我同樑仔則別有想法
我們每人去拿了一大杯雪糕
我的當然以朱古力為主
樑仔就四色齊備
跟住就走埋去朱古力噴泉
在人少的當兒
拿個小匙把朱古力往雪糕上曬

回到座位時
美味的「朱古力脆皮雪糕新地」就完成了！
真的,很美味呀！哈！

最後大家都食得飽飽才離去
一餐很抵食的自助餐！

<史密夫決戰史密妻> (Mr. & Mrs. Smith)

一個食字食得唔錯的戲名
畢彼特做丈夫
安祖蓮娜祖莉做妻子
大概就是去看這齣戲的誘因

大体上係搞笑作品
戲情就不重要
可以叫說得通罷....
型男美女的招徠
槍戰動作都夠緊張

如果想可以不怎麼用腦
只享受一些視覺聽覺的刺激
舒舒服服去睇一齣戲
這齣應該是不錯的選擇

另外
今次選了在馬鞍山戲院看
起因是價錢平很多
星期一至五全日都係35元
比起出沙田要55元......

開頭都係博一博
如果係似希爾頓那種蚊型戲院
就算幾平都冇下次

但，驚喜地
它真的很不錯
有十四五行座位
銀幕升高小許
坐哪兒亦不怕遮擋
音響很不錯
和銀幕亦有很遠距離
影院深度和沙田UA的細院差不多
只是每行冇咁闊罷.....

以這樣的價錢.....簡直係超值

狂風暴雨

早上醒來，
很像到了水簾洞中，
從窗子看出外，
除了水之外甚麼也看不見。

冒著暴雨離家的感覺真的很無奈
就算拿著傘子還是要半身濕透

雨水好像下不完似的
一下又一下地衝擊著各人的傘子
間或夾雜著耀眼的閃電
及震耳欲聾的雷鳴

今天雷震子不知是特別勤力
還是被人氣壞了
每一下打雷都不遺餘力
在等著過馬路的時候
一個極級大聲的雷聲
把馬路兩岸的途人都嚇了一跳

很久沒有這麼一種怕打雷的感覺了！

那一下之後
立即急步行去有得避雨的火車站去
心有面真的有一陣寒意...

回到公司時
膝蓋以下盡都濕了
幸好今天選了短褲加涼鞋
要不是又要濕著半條褲大半天了......

粗口討論

放心,當然不是說用粗口來討論啦.....

今天在icq和某君無意中來了一段短短的討論
內容是和粗口有關的，
當然這些討論是永遠都唔會有結論的
只是完了後突然係想把這大段對話記於此罷

某︰頂...悶

森︰悶咪悶lor........唔好頂得唔得呀？

某︰做乜喎

森︰哈...只係覺得做人要尊重自己個身份罷...^_^
　　唔記得我寫過一篇有關粗言的野咩？
　　雖然「頂」唔算係粗口
　　所以我都係問您唔講好唔好o者...冇話唔俾您講...哈

某︰我覺得適當的時候要發泄下
　　唔好被咁多規條規住自己

森︰「唔好被咁多規條規住自己」
　　這句就是這一代的一大問題...
　　正如亂寫字一樣...
　　如果您個學生咁同您講...
　　「寫出來大家明咪得lor...駛乜一定唔寫白字別字
　　用o的英文代o的音快幾多呀...駛乜成日規住自己...」
　　您會點？
　　我同意好多野係有灰色的...
　　但有些事情對就對, 錯就錯...冇得一句規住自己就大晒
　　發泄有好多方法...如果要靠亂講野來發的話
　　未免太低了罷...

某︰這是這一代的問題
　　我亦不同意用這個理由有什麼問題
　　不要濫用就可以了

森︰唔知呢...我對這方面條底線係set到好高的

某︰嗯...這會有礙你的創造力

森︰這又唔會喎...
　　我覺得在文學, 戲劇, 藝術, 學術上...
　　要合理地用到粗言...我覺得ok喎
　　咁您真係講緊個下三濫的小廝, 佢係真係會講,
　　那又如何？...那只是反影現實的東西
　　那和真係出之於自己之口是兩碼子的事...

某︰不明這幾句
　　「咁您真係講緊個下三濫的小廝, 佢係真係會講,
　　那又如何？...那只是反影現實的東西」
　　什麼叫合理地使用呢!?

森︰如果寫緊的故事...那角色真係下三濫的小廝
　　咁那個角色的對白有粗言就冇所謂啦
　　如果為了嘩眾取寵, 要個做教書的, 或者小朋友等等,
　　突然係個無必要的位講粗口...咁...就係不合理的使用

　　以上全部係講緊創作上的東西
　　在我自己本身而言, 我係冇一刻會覺得自己係合理講粗口的...

　　因為我會覺得
　　粗話...即係乜呢？
　　即係禁語...即係普遍社會都視為不潔,不應說出口的東西
　　係咪因為一句發泄就可以理直氣壯地做呢？
　　食軟性毒品都係普遍社會都視為不潔,不應食的東西
　　係咪因為一句發泄就可以理直氣壯地食呢？
　　要說還有很多...

某︰咁我倒想知
　　為何叫邊青學英文粗口總是特別容易?
　　吸食毒品從前是上流社會的玩意, 現今也有用於醫學

森︰為何叫邊青學英文粗口總是特別容易?
　　點解,因為佢地想講粗口lor
　　問係應該問, 點解要教佢地講英文粗口？
　　真係可以提諣佢地對學英文的興趣？
　　唔好玩啦, 佢地連中文都未識呀！
　　每句唔放o的粗口字都表達唔到自己的想法!!!
　　唔好俾個咁牽強的藉口自己啦...

　　吸食毒品從前是上流社會的玩意, 現今也有用於醫學
　　當時係上流社會的玩意...因為當時佢地無知！
　　後來事實係點呀？...
　　係英國o的貴族將o的毒品賣晒去o的更無知的國家
　　仲要走去乜都唔知的印度....非洲等地方種鴉片
　　搞到好多地到現在都仲未種得返農作物...

　　用於醫學更不用說...那些應當係醫藥的範圍...
　　唔通可以拿來醫人就可以食？
　　咁唔怪得咁多白痴走去食咳藥水食上癮...
　　這是哪門子的歪理？！

某︰究竟合唔合理係邊個定!?
　　你咁講即係一個粗人同邊青就有資格說粗話了!?

森︰正如有一次在電台節目聽到一個語言學教授談論粗口的問題

　　佢可以分析到好多點解o的粗人或邊青甚至無知青年會說粗話
　　有o的理由係好明白, 好令人理解的
　　但理解係一件事, 就算係諒解都好
　　並沒有人話明白佢的講粗口的原因就等於佢有權講

　　道理係邊？
　　粗言既是一種禁忌或一種受禁止的行為
　　跟本無人有特權去講罷...
　　正如偷東西, 犯法等等一樣...
　　但我們一樣會有犯罪心理學,
　　一樣會去看看為何那人會犯法
　　大部份都會找到原因...
　　可能佢冇錢就餓死
　　可能佢無知...
　　甚至有些情況會好令人同情...會給人諒解
　　但並唔等於佢有權去錯
　　佢一樣要受應得的處罰
　　只係在罰佢的同事會有點同情佢...

　　同理, 對住那些粗人, 邊青等等的人
　　我唔覺得佢地講粗口係理正氣壯理所當然
　　同樣我會討厭佢不屑佢地......
　　但當中會有一點點同情
　　同情佢地冇人教
　　同情佢地無知
　　同情佢地為了被人認同而跟風..........

　　所以如果係受我教,受我勸,受我關心的人
　　我是不會忍的, 我一定會出聲........
　　當然改唔改係佢地的自由.........

　　請想清楚甚麼是道理
　　我不覺得自己所說的一定正確
　　那只是我自己的觀點.......
　　但, 請不要輕易用一些歪理來容忍自己做一些不應幹的事情

婆婆,Byebye

經過了兩天的程序及儀式
總算送了婆婆最後一程了

只願婆婆安息
在生者能盡婆婆的心願活得更好

其他一切也不重要了.....

健康生活

星期六朝及今早
都是一大清早起來
和女友去游一個小時水才返工

為了可以早起床
還特意十二點前就睡呢
真的是很健康的生活

可能因為太耐冇做運動了
是有點累的....
但身体累不要緊呀
做完運動至少可以令心情放鬆一下

早上的泳池有一個好處
就是人不多
真的是游泳而不是「浸水」
就連去玩滑水梯亦不需要排隊

不知這樣的早睡早起
又有運動做的生活能否維持下去呢？

如果可以的話
真的有點想像不到......

面試實錄

這個題目有點兒誤導.....
其實不是我去面試.......
而是有人來我公司面試

由前個星期四開始
用了一個星期的時間去和一些應徵者見面
前後大概見過8個人左右

並不是要請長工
只是想找人做做part-time
或者是freelance罷

來見工的大致上都想讀緊大學的
有一個好奇怪的現像
就是咁多個應徵者中
只有一個是男仔........
呀,還有一個的,
但他卻失約了......

初時以為現在的男仔愛玩所以連暑假都不找工作做
但這幾天才發現事實原來是......
那些男仔比較遲鈍........
竟然在廣告出了兩個星期
我們都已決定了用甚麼人後的昨天......
才收到三個男仔的應徵電郵！

還是說回面試的情形罷.....
我和拍擋己經唔係嚴肅的人
但好明顯他們都是很緊張的
通常到談一會後才開始放鬆下來

有時見工真的要做下功課的
有些人，根本就不知道這個職位是做甚麼的
甚至擺出一副
「我甚麼都不懂呀！想來工作學下嘢罷」
的樣子.....唉！

可能真是還在求學階段罷.....
見工的經驗明顯的淺....

說實在的....其實我都係見過兩三次工罷....
但原來倒轉來站在見人的位置上時
會看到很多東西的.....

如果大家有需要再去見工時
可以留意一下以下幾點......

1) 不要太緊張，對方想請人並不是想殺人
2) 好好預備一下要給人看的東西，不要只是拿著滑鼠亂按
3) 說話請慢一點，給人看的東西亦要放慢一點
4) 表達自己想學野不是問題，但請不要讓人覺得你是「全部」東西都要學
5) 最好問一些特別點又到point的問題，可使人覺得你真的有為份工想過下野
6) 早或遲到不是大問題，最緊要有電話通知....
7) 千祈唔好冇到又冇電話，你份resume幾勁都好，都唔會有人俾多次機會你的
8) 可以盡量表達自己的長處，但請不要過份班門弄斧
9) 記住是介紹自己的東西，不要介紹錯了別人的東西......
　例如︰我不需要你同我講maya及3dMax有幾好用，motion capture有幾利害....
10) 可以的話留下一些自己的作品或東西，因為見得太多人後，好易分唔清邊個打邊個......

最終都有三四個人是可以一試的
如果真的有交帶有幫到手的話
對公司來說，可以說是一個新里程碑

祝褔

今天有一個人要入醫院
過兩天就要在肚皮上開一刀
做一個外科手術.....

想了很久
最後決定在這兒寫下這一刻心中所想的

不是想給甚麼人看
只是想忠於自己的在這兒寫下我的祝褔

藉得欣慰的是
你是主動的告知我這個消息
亦都有問了我一點意見
當然大概你不太想跟著我的意見做罷...

雖然你極力使自己好像沒甚麼事一樣
但是.....你必定又是獨個兒在擔心
獨個兒在亂想罷.......

其實那也難怪的
講真，連我這個作旁人的
亦會為你擔心....
更勿論你自己啦...

從來，你在別人的面前總是裝得堅堅強強的......
希望你今次真的可以做到外在和內在都是堅強的
現在可以做的，除了信任醫生外
就是自己樂觀積極的去面對

可能我寫得太遲了……
或許要待你出院時才可以看到
但甚麼都沒有所謂了
最緊要是你早日康復出院罷了

放心啦，捱刀子我有經驗
並不如想像中痛，日子其實轉眼就過
不過事後真的要好好護理一下
這方面真的不可以任性的呀！

但願手術順利的進行，
而且只是需要割去那可惡的瘤
其他則完好地留在原位啦！

沒有甚麼可以幫到你
但我會為你的事祈禱
即使你不信也好……