RSS訂閱法國 3:1 波蘭
上半場波蘭嘅表現比起分組賽時積極咗好多，仲有兩三次差啲入波嘅機會，但一係就把握力差，一係就羅里斯救到。而且好肯跑多幾步，前場迫下搶下，法國隊攻勢都冇咁得心應手。
正當以為守和半場的時候，44分幾鐘就畀基奧特衝入禁區破越位接應麥巴比傳球近門射入。
下半場出來，波蘭想搶返主動追返一球，但時間一耐咗，開始比法國隊控制咗比賽節奏。
74分鐘，麥巴比禁區頂接應丹比利傳球，勁射破網，拋離到2:0。
去到90分鐘，麥巴比响左禁區崎角位攞到波，堆橫一步，大腳抽去遠柱，施捷斯尼掂到少少個波都照入網。
大勢已去，波蘭補時嗰幾分鐘繼續盡力破蛋，96分鐘，傳中波射中咗後衛嘅手，球証睇完VAR判十二碼。
睇得出利雲度夫斯基好想入波，但第一場射失十二碼嘅陰影尤在，未射都見到佢好緊張。
果然，見佢助跑窒下窒下咁，想等羅里斯跌咗埋一邊先射，但窒咗幾下，射個波出去冇力畀羅里斯接實咗⋯⋯但球証話羅里斯早咗向前跳，因為畀佢窒步Fake咗⋯⋯總之要重射。
難得有多一次機會，仲以為呢個歐洲神射手會大腳射門，點知佢竟然又係窒下窒下咁埋去踢，羅里斯忍唔住重心移咗去右邊，佢就細細力射左邊⋯⋯羅里斯個表情好似話：唓乜你咁㗎。
係，佢係終於响世界盃埋齋入到十二碼了，但我覺得有啲核突囉咁射法。
完場法國勝出，晉級八強。
同埋墨西哥應該勁唔開心，波蘭難得嚟到十六強踢成咁，佢哋只係差一球得失球飲恨！
英格蘭 3:0 塞內加爾
頭嗰三十分鐘，我諗大部份英格蘭球迷都會嚇親，完全比塞內加爾㩒住嚟攻，仲有兩三次機會差啲就射入。係喎，同之前三場十六強好似，開頭被睇淡嘅一隊跟得好好，仲差啲可以領先，但就係差嗰啲啲，把握唔到，就係問題所在。
正當以為英格蘭呢場有麻煩嘅時候，38分鐘，哈利簡尼中場附近放在直線畀比寧咸快放入禁區，在傳地波去中間，佐敦軒達臣撞射入網，竟然第一個中框攻門就入咗波！
塞內加爾唯有更加主攻，去到45＋3分鐘，攻門不成畀英格蘭一個快速反擊，比寧咸响自己禁區頂搶到波，快速跑到中圈，傳俾左路嘅科頓，科頓第一時間彈個波俾右邊嘅哈利簡尼，佢跑多十幾碼入禁區就起腳勁射返左邊入網！
上屆嘅神射手，嚟到第四場，終於開齋了！
認真，30分鐘時，如果你同我講英格蘭會領先兩球返更衣室我唔會信囉⋯⋯
有兩球响手，下半場就踢得舒服好多，去到57分鐘，科頓左邊偷到波，跑到三閘線一個急勁地波傳中去到最遠冇人看管嘅沙卡腳下輕輕一射入網。
三個後生仔 比寧咸(19)、科頓(22)、沙卡(21)今場都有好表現，另外哈利簡尼有波入都替佢開心嘅。
塞內加爾輸到三球都知大勢已去，只有零星嘅攻勢。最終3:0完場。
英格蘭晉級，八強會大戰法國，今屆除咗睇美斯、C朗最後探戈之外，都係時候睇下呢堆新生球星有冇一兩個係未來十幾年嘅傳奇開始。
純粹私人感情，唔想法國入四強，支持英格蘭！
0 留言:
發佈留言