RSS訂閱十六強嘅最後一日，之前三日嗰六場比賽，結果都算正路，係日本對克羅地亞嗰場最旗鼓相當。
摩洛哥 0:0 西班牙 PK:3:0
最後一隊非洲球隊，甚至係最後一隊非歐洲及南美球隊，摩洛哥賽前畀睇低一線。尤其是小組賽西班牙嘅攻力好似好理害，滿意為佢哋小組次名嚟到下線，避開克羅地亞、巴西、阿根庭係好彩。
怎料今場摩洛哥今場集中全力防守，而且仲做得好好，非常之好！
睇落去大概係5-4-1 或者 4-3-2-1 既陣型，不過實際上，好多時間都有如6，7個人塞响禁區做防務，對着西班牙隊呢隊用短傳打組織為主嘅，真係好有效咁阻擋咗佢大部份攻勢！
响近乎冇乜射中過龍嘅情況之下，90分鐘0:0，進入加時。全場120分鐘計，攻門次數係6(3):14(2)，射中目標要守門員出手嘅次數真係好少⋯⋯反而如果摩洛哥嘅前鋒把握力好啲，一早就入波領先了！
加時嗰半個鐘係比較刺激嘅，大家都唔想射十二碼分勝負，去到最後一秒西班牙近底線好窄角度嘅射門啱啱中遠柱彈出，就係咁要等十二碼決勝了。
摩洛哥先射，Sabiri 好有信心咁勁射入咗
西班牙派咗120分鐘先換入來，未試過射失十二碼嘅Sarabia踢第一球，佢都算有信心，勁射入下角，守門員捉到路，但眼看都趕唔切，個波卻大力中柱彈出 1:0
第二輪，摩洛哥Ziyech 狂轟中間輕鬆射入，但西班牙嘅Carlos Soler 好明顯超級緊張，唔算快嘅助跑，唔夠力唔夠角度咁射去右下方，守門員又估中成功拍出 2:0
第三輪，同樣係120分鐘先換入來嘅Benoun，响有兩球領先之下，反而好緊張，窒步助跑射左邊，畀守門員救咗。到西班牙嘅老大哥布斯基斯Busquets，難得人哋射唔入，以為佢會把握機會追近一球⋯⋯⋯但佢都係慢慢助跑射左邊，守門員再次估中救出，仲送咗個好開心嘅笑容回禮 2:0
第四輪，Hakimi 輕鬆咁挑射正中間，守門員撲咗去左邊⋯⋯ 3:0 同昨天一樣，未射晒五輪就分咗勝負。
西班牙連續兩屆十六強輸十二碼出局⋯⋯仲有去年嘅歐國盃都係輸十二碼四強止步⋯⋯安歷基仲話練咗1000球以上十二碼⋯⋯
葡萄牙 6:1 瑞士
賽前見到陣容，C朗竟然冇咗正選！聽聞同佢上一場提早換出發脾氣有關，連葡萄牙國內投票，都超過七成贊成唔應該畀佢正選出場！
代替佢嘅係21歲嘅後生仔干沙路拉莫斯Goncalo Ramos，踢咗74分鐘，成為今屆第一個帽子戲法嘅球員，仲有一球助攻！C朗應該可以放心退位讓賢了。
講返場波，真係冇諗過一面倒成咁，冇咗C朗，反而隊波踢得爽快咗，加上拉莫斯好夠膽，第一球真係冇人估到佢响嗰個位突然轉身就勁射掛網！
再加上33分鐘，39歲嘅比比Pepe，接應角球，一記好標準嘅頭槌入波，領先2:0，更破埋C朗記錄，成為年紀最大入波嘅葡萄牙球員。
下半場返出來，瑞士冇咩改善，好似完全頂唔住啲攻勢咁，51, 55分鐘拉莫斯一射一傳再失兩球，雖然58分鐘Akanji 成功破蛋，但亦都無阻拉莫斯67分鐘完成佢嘅帽子戲法。
74分鐘，終於換返C朗出場，拉莫斯休息，全場都為佢兩個拍晒手掌。
之後嗰十幾分鐘，睇得出C朗好想入波，都畀佢入咗一球嘅，不過好明顯越位在先啫。
去到90+2分鐘，另一個23歲年青人Leao，冇傳畀走咗靚位嘅C朗，自己射咗球靚波埋齋6:1！
再加上另一個23歲嘅祖奧菲歷斯Joao Felix嘅好表現，看來葡萄牙已經準備好後C朗年代嘅來臨。
看來响美斯C朗時代即將落幕之際，好幾隊都有一啲新生代準備力爭成為之後十年八載嘅球王。
0 留言:
發佈留言