RSS訂閱日本 1:1 克羅地亞 PK 1:3
日本隊上半場踢得好好，採取主動，好早已制造多次埋門機會，多次兩邊出波都差啲可以射門得分。估唔到上半場係日本隊氣勢贏晒對手，克羅地亞只係偶有反擊，日本隊全隊都好勤力迫搶，去到43分鐘，一個短角球戰術，交兩腳之後傳中，混亂間前鋒前田大然快腳把個波射咗入網！
踢到第四場，終於能夠先開記錄！仲可以保持勝局返更衣室。
下半場克羅地亞積極搶攻，更善用佢哋身高嘅優勢，多次嘗試高空攻勢。
55分鐘，一個高波傳入中路，熱刺嘅佩里錫睇準時機，好靚咁頂咗個波去遠柱入網。
1:1 之後互有攻手，但克羅地亞定返落嚟之後，搶返多啲主動權，日本隊開始變咗穩守突擊。
就算下半場中段，照舊換入三笘薰、南野拓實、淺野拓磨、田中碧等上幾場嘅功臣，亦未能再一次爭取到入球。
克羅地亞雖然不停空襲，但亦打破唔到僵局。最後加時30分鐘亦分唔到勝負，今屆第一次要用最殘忍嘅十二碼大戰來分高下。
日本抽到較有利心理關口嘅先射，第一球就係南野拓實操刀，射去右下角，唔算勁射，被守門員撲出！克羅地亞球員Vlasic勁射破網 0:1
第二球係三笘薰主射，左下角，但又係冇乜力，亦被守門員捉到路救出，睇得出日本隊嘅球員對射十二碼充滿壓力！克羅地亞球員Brozovic又係大力抽射破網 0:2
第三球淺野拓磨受住壓力大腳射入，相反到克羅地亞球員Livaja緊張到近乎零助跑咁射中柱 1:2
滿意為仲有機會，第四球到隊長吉田麻也操刀，但都係見佢好大壓力，都係唔敢抽射，再射左下角，又一次被守門員救出⋯⋯
而克羅地亞嘅Pasalic就大大力勁射中間，守門員撲咗去左邊⋯⋯1:3 第五輪都唔駛射了⋯⋯
就係咁，日本隊再一次在十六強出局，不過今屆表現絕不失禮，能夠壓過西班牙、德國，小組首名出線實在係令人眼前一亮。
不過真係要練好啲十二碼，四年後再挑戰世界盃嘅寶座啦足球小將們！
巴西 4:1 韓國
日本同克羅地亞都有得鬥下，諗住呢場都仲有啲精彩攻防戰睇下，但可能對嘅係巴西，韓國球員踢得明顯係冇日本球員咁放。
巴西隊進攻時傳來傳去，韓國後防有啲應接不來。只係7分鐘啫，尼馬右路地波傳入禁區，幾個後衛同兩個巴西球員都掂唔到個波，直接去左遠柱畀雲利素斯控定，守門員同後衛衝埋去想擋已慢了半步，佢射一個高波網頂入網，領先 1:0。
去到13分鐘，個波入咗禁區韓國後衛想大腳解圍，但慢過從後而來嘅李察利臣少少，仲踢仲咗佢鞋底⋯⋯球証二話不說直指十二碼點！！
尼馬主射，沒有被守門員企大細邊影響，順利射入，領先2:0⋯⋯
29分鐘，幾腳one touch傳球，成功突破防線嘅李察利臣近門射入到3:0⋯⋯
36分鐘，角球傳中，個波頂返出禁區頂，畀後上嘅Paqueta 一腳掃把腳射穿人群，遠柱入網 4:0！
唉，估唔到佢哋兩隊嘅實力差咁遠！
半場之後，巴西隊都偶有攻門，好彩守門員都勇救幾球。孫興慜一個反擊，終於有機會用佢嘅招牌射門，眼看巴西門將封唔到位，但竟然左肩好彩仲掂到個波少少彈咗個波出界！
全場孫興慜多次响禁區頂想推橫射門，但應該係人都知佢有此一著，次次到最少有兩個人响前面擋住⋯⋯ 最後佢一球都冇入真係替佢可惜⋯⋯
幸好努力都有少少回報，76分鐘，到韓國嘅白勝浩，响禁區頂勁射禁區中間混亂頂出來嘅波，食到好應好大力咁轟咗入網，成功破蛋，現場嘅韓國觀眾都好高興。
巴西下半場都收咁啲主力，三號門將都換佢出來踢咗十幾分鐘，最後鎖定4:1勝局晉級。
八強 克羅地亞 大戰 巴西，唔知今時今日嘅克羅地亞應唔應付到呢球如狼似虎嘅巴西球員呢？
0 留言:
發佈留言