RSS訂閱巴西 0(1):0(1) 克羅地亞 PK 2:4
克羅地亞真係一啲都唔易應付，上一場已經同日本踢足百二分鐘，射十二馬才晉級，但今場一啲都唔覺得佢哋攰，而且仲唔係被動齋守唔攻，全場控球百分比有52%比巴西還要高少少。
佢哋控傳做得好，唔急於攻門，但最少佢控住嗰波嗰一半時間，巴西都對佢哋冇威脅，個波响自己度。
巴西隊亦試咗好多方法，亦製造咗唔少攻門，全場攻門次數 18(11):9(1) ，克羅地亞守門員成功救咗10次射中嘅攻門，功不可没！
去到加時上半場臨完場，尼馬同隊友一個好靚嘅撞牆，穿過咗後衛們，終於成功入到克羅地亞一球！
眼見克羅地亞踢咗105分鐘，一腳射中嘅攻門都未有，都估佢大勢已去⋯⋯而巴西有一球响手亦沒有齋死守，兩隊繼續有進攻。
去到117分鐘，Petkovic一腳遠射，中途擦到少少巴西4號仔Marquinhos大脾彈高咗少少，咁就成為第一個中目標射門，亦都係唯一嘅入球！
就係咁戲劇性地，1:1完場，要十二碼分勝負！
克羅地亞又連續兩場要射十二碼，四年前，佢哋十六強及八強都係靠十二碼晉級，而且計埋呢場，佢哋係近9場大賽淘汰賽，有8場都係要加時甚至十二碼才分勝負，唯一冇加時就係上屆決賽輸畀法國嗰一場。
克羅地亞先派Vlasic 射入，巴西就由洛迪高先射，佢算有信心㗎啦，不過被利華高域估中咗，擋出。第一輪 0:1。
後兩輪克羅地亞嘅Majer, Modric 以及 巴西嘅Casemiro, Pedro 都射入，三輪過後2:3。
第四輪，克羅地亞Orsic好靚射死角入網，巴西嘅4號仔Marquinhos都充滿信心咁射埋同一個位左下角，守門員都捉錯路，但個波剛剛中內柱彈出！ 2:4！
又一次唔駛射第五輪，尼馬都未有機會射就完咗了。
克羅地亞殺入四強！巴西又再一次大熱出局！
尼馬即刻哭了出來，喊得好傷心，佢都三十歲了，唔知仲有冇下一屆。
不過摩迪又真係勁到痴線，37歲，但係佢嘅活動範圍之大，無限嘅體力，真係令人吃驚！
阿根庭 2:2 荷蘭 PK 4:3
呢兩隊係怨家老對手，新仇舊恨數唔清，加上今場嘅主球証好古怪，係咁畀黃牌，就連後備席上面嘅助教，後備球員都唔放過，一共畀咗 18張黃牌，最後完晒場嗰張變成兩黃一紅，但都冇意義㗎啦。
應該吹罰，畀牌嗰啲，佢又唔吹唔畀，有時只係投訴多一兩句，佢又立即畀，所以搞到場內越來越勁火藥味。
大半場來講，都係阿根庭主攻，荷蘭繼續佢哋教練雲高爾口中嗰句：有人話係最悶嘅足球，我就話係勝利嘅足球。
咁咪即係死守等機會反擊囉。
但無論佢哋搵幾多個人守都好，去到三十幾分鐘，美斯一個絕妙嘅手術刀式傳球，一下就劏穿咗六個橙衫球員，成功傳到後上嘅摩連拿腳上，佢一控一射就入波了！睇返慢鏡，美斯由攞波，控左，推左走幾步，全程係冇望過右邊，呃晒所有人注意力去左邊嘅時候，佢唔知點睇到摩連拿跑入禁區，突然望都唔駛望就好靚咁响右邊，反方向咁交咗呢腳方向，力度都啱啱好嘅助攻！連講波嘅專業評述都驚嘆：how can he found that path!
之後一直都保持優勢，努力搵多一球保險入球，只是每次都差少少。去到73分鐘，响禁區邊得到一個十二碼！ 當然都係美斯主射，雖然佢分組賽第三場嗰球射唔入⋯⋯
今次佢好淡定咁見到守門員郁咗少少就射另一邊入網，順利領先到 2:0！仲諗住終於有一場安安樂樂輕鬆勝出唔駛擔心嘅比賽⋯⋯點知⋯⋯
落後兩球之後，荷蘭換咗好高嘅Weghorst 入來，不停都係咁高波斬入禁區畀佢頂，又偏偏畀佢83分鐘真係頂入咗一球！
滿以為差幾分鐘完場，點知球証話補時10分鐘！
捱到去100分鐘，响禁區頂犯規，荷蘭有一個罰球。一個完全可以直射嘅距離，時間得返幾秒，佢竟然冇射門，而係細力傳畀三人組成嘅反人牆嗰度！
呢一個出奇嘅舉動，搞到大家亂一亂，佢哋中間嗰個控一控個波，輕力咁篤咗個波去遠柱入網！竟然响呢個時間追成 2:2!!!!
我真係暈啦！咁樣要嚟加時，真係激死人。
計埋加時，全場攻門數字 15(6):6(2)，荷蘭其實只係得入波嗰兩腳中目標⋯⋯
加時大家都攻唔入，第二場八強，又要用十二碼分勝負。
荷蘭先射，今次又係守門員馬天尼斯嘅表演，頭兩球估中晒救出咗 Van Dijk, Berghuis 嘅射門。 美斯& Paredes 就順利射入。
第三輪大家都射入，3:1。
第四輪，荷蘭Weghorst 射入，只要安素費迪斯射入埋就完場，但卻响左邊射咗出界！3:2
第五輪，荷蘭De Jong射入，見到阿根庭係由拿泰路馬天尼斯主射，個心嚇一嚇，佢上一場嘅表現真係嚇人幾驚！好彩佢都係國米嘅神射手，終於順利將個波放入網！ 4:3 贏波！
有驚無險，終於可以再行多一步，入四強啦！
賽後有好多唔同嘅聲音，雙方都不滿球証，各自都覺得對方被偏幫，可能客觀啲睇，係個球証根本亂嚟⋯⋯
另外，美斯賽後表現得好嬲，原來荷蘭方面賽前已講好多說話侮辱佢哋，比賽中大家都充滿火藥味。到射十二碼時，荷蘭球員更冇品到去騒擾每一個行去十二碼點嘅阿根庭球員！
不過好彩最後都贏咗，其他嘢嬲完就算啦！只差兩場就可以實現夢想！
0 留言:
發佈留言